Kum shibynta na ka jingrakhe ïa ka Jubili Ksiar jong ka Amlarem Sub-Division bad ka jingkynmaw burom ïaka 5th Foundation Day jong ka Ministry of Co-operation, ka Sorkar India, ka ophis Sub-Divisional School Education Officer (SDSEO), Amlarem ha ryngkat ka jingïatreilang bad ka ophis Sub-Registrar of Co-operative Societies (SRCS), Amlarem kila pynlong ïaka jingïakop jingkyntip “Amlarem Golden Jubilee Quiz Competition” mynta ka sngi ha Training Hall, BDO Amlarem C&RD Block.
Ïa kane ka prokram la pynïaid da ka kong Diamond Khyriem, ka Dr. W. Sumer kaba dei ka District School Education Officer, West Jaiñtia Hills District kala long kum ka kongsan. Katba u Dr. D. Lyngdoh, Block Development Officer, Amlarem C&RD Block kum u symbud kongsan nalor kiwei kiwei de.
Ka Dr. W. Sumer haba ai jingkren ha kane ka sngi kala ai khublei ïa ki nongpynïaid kiba la lah ban pynïaid beit ïaid ryntih ïa kane ka jingïakop ‘Quiz Competition’ kum shibynta ban rakhe ïa ka Golden Jubilee. Kala pynpaw ïa ka jingdonkam kum ki nongshong shnong kiba don ka jingkitkhlieh bad ka la pynshlur ïa ki khynnah skul ba kin pylleit jingmut haka jingpule puthi, ha ka juh ka por kala ai khublei ïa baroh ki skul kiba la wan ban ïashim bynta lang.
Ha kane ka jingïakob Quiz la wan shakhmat bha da ki saw tylli ki skul jong ka Sub-Division kata ka Sohkha Government Higher Secondary School, ka Syiem Jingsuk Higher Secondary School, Padu Higher Secondary School bad ka Nongtalang Government Higher Secondary School.
Na ka liang ka Sohkha Government Higher Secondary School ka la wan ha ka kyrdan kaba nyngkong da kaba khur 25 point. Ka Nongtalang Government Higher Secondary School ka la ïoh ïa ka kyrdan kaba ar da kaba kamai 20 point, katba ka Ka Syiem Jingsuk Higher Secondary School ka la wan ha ka kyrdan kaba lai da kaba kamai 10 point.
La sam ruh ïa ki khusnam ba kyrpang na ka bynta ki skul kiba ïashim bynta kata ka Mang Hai Ryum Higher Secondary School, Laishnong Higher Secondary School, Riwar Jaiñtia Church of God, bad ka Padu Higher Secondary School.
La pynkut ïa kane ka prokram da ka jingkren ai khublei da u Lumlangki Pohti, Assistant Engineer, BDO Amlarem C&RD Block bad u Dkhot jong ka Education Jubilee Committee, uba la pynpaw ka jingsngewnguh ïa ki riew rangbah, ki skul kiba la ïashim bynta, kumjuh ïa ki nongpynïaid bad baroh kiba ïadon bynta lang ban pynlong ïa kane ka prorkam kaba jop.