Hadien ba u lat ka jylla u la thaw ia ka Regional Committee ban ia pynbeit pud hapdeng ka Jylla bad Assam ia hynriew tylli ki jaka ia kajia pud hapdeng ka jylla bad Assam ba la tip kum ka Phase- 2.
U Chairman ka Hynniewtrep Border Dispute Redressal Forum (HBDRF) u Bah Chandame Sungoh haba kren sha ki lad pathai khubor ha ka 2 tarik Jylliew 2026 u la pynpaw ka jingai khublei ia ka Sorkar jylla kaba la shimkhia ban pynbeit noh ia u pud u sam hapdeng ka jylla Assam bad Meghalaya kaba lah neh mynta da ki phew snem.
Hadien ba la pynmih ia ka hukum da ka Sorkar jylla na ka bynta ka jingpynbeit pud ka Hynniewtrep Border Dispute Redressal Forum ka kmen shisha bad ka la ai da ka jingthoh sha u Myntri Rangbah ka jylla u Conrad K Sangma bad kumjuh sha u Symbud Myntri Rangbah u Bah Sniawbhalang Dhar uba dei ruh u Chairman ka Regional Committee jong ka West Jaintia Hills District, bad kumjuh sha u DC ka West Jaintia Hills District uba long ruh u Member Convenor jong kane ka Regional Committee West Jaintia Hills District la ong u Chairman ka Hynniewtrep Border Dispute Redrressal Forum u bah Chandame Sungoh.
Shuh shuh u la ong ka Hynniewtrep Border dispute Redrressal Forum ka la phah ia ka jingthoh ba ka Regional Committee ka dei ban bud beit kat kum ka jingbthah bad ka jingthoh kumba la pynmih da ka Sorkar jylla.
Khatduh u la pynpaw haba iadei bad ka MDA -1 ka Regional Committee ka pynlong jingialang tang ha Jowai bad ha DC ophis hynrei kyrmen ba kane ka MDA -2 kam dei ban pynlong ia ka jingialang tang ha Jowai ne ha DC ophis hynrei ki dei ban leit jurip ia ki jaka ha Block -1 bad ha ki jaka ba long dispute area bad ha manla ki Shnong ki dei ban iakren bad ban lum ban lang ia ki jingtip baroh kiba don ha kitei ki Shnong.
Ka Hynniewtrep Border Dispute Redrressal Forum ka kyntu ia ka Sorkar ba ka dei ban bud thik ia ki aiñ ki kyndon ba la kdew ha ka Regional Committee bad ka HBDRF ka kloi ban ai ka kti ka mon ka kti ka diang ban iatreilang bad ka Sorkar na ka bynta ka jingiaid beit iaid ryntih jong kane ka kam pynbeit pud pynbeit sam.