Ka Jaiñtia National Council (JNC), Publicity Cell, CEC ka pynpaw ïa ka jingpynrem jur halor ka jingjia jong ka jingshah pynïap u Kyrshan Lamurong uba la jah noh naduh ka 15 tarik u Jylliew 2026 ryngkat bad ka kali S-Presso ba dang thymmai jong u kaba wat tang ka Registration Number ruh ym pat don.
Na ka liang ka JNC kala pynpaw ba kane ka jingjia kum kane kam dei shuh tang ka kam runar hynrei ka dei ruh kum ka jingmaham kaba jur ïa ka imlang sahlang kaba ym dei shuh ban shim sting na ka bynta ka jingshngaiñ jong ki nongshong shnong. Ka jingduh noh ïa kawei ka jingim ha kum kane ka rukom kaba sngewsih ka la wanrah ïa ka jingsngewsih bad jingbitar kaba jur ïa ka seng, bad ka JNC ka ieng skhem ryngkat bad phah ruh kane ka khubor sngewlem sha kiba ha ïing ha sem jong u Kyrshan.
Halor kane ka jingjia ba sngewsih, na ka liang ka seng ka buh ka jingkyntu ïa ki bor pynïaid shnong naduh ki Dorbar bad ki khlieh nongsynshar shnong ka kin long kiba husiar bad peit thuh bha halor ka jingwan jingleit jong ki briew kiba nabar kiba wan rung ne wan shong wan sah ha ki shnong ki thaw.
Ka seng ka la pynkynmaw ba ka la ju kyrpad bun bun sien ïa ki bor pynïaid shnong ban phikir bha ïa ka imlang ka sahlang, ha kaba ki briew kiba nabar ki bym lah ban ithuh ne pynshisha kin ïoh ban im bad ïaid laitluid hapoh ki shnong ki thaw. Mynta ka kynti na ka liang ka JNC kala pynpaw ba kan ai bor ïa baroh ki Unit, ki Circle bad ki Zone jong ka kiba don ha ri lum Jaiñtia ban sdang ïa ka kam khynra ïa kino kino ki briew ki bym dei trai shnong katkum ki kyndon jong ka aiñ.
Khadduh eh ka JNC ka dawa ïa ki Pulit ba ki dei ban pynlong ka jingtohkit kaba stet bad kaba khuid khnang ban pynthikna ïa kiba donkti ha kane ka kam runar bad ban pynngat ïa ki ha ki kyndon aiñ kiba khlaiñ. Kumjuh ruh ka JNC kan ïai bud dien halor kane ka jingtohkit jong ki Pulit khnang ba kiba ha ïing ha sem jong u Kyrshan Lamurong kin ïoh ïa ka hok ba pura.