U Dr. M. Lamare, uba dei u District Animal Husbandry and Veterinary Officer jong ka East Jaiñtia Hills District, haba kren sha ki lad pathai khubor halor ka jingpur jong ka jingpang African swine fever kaba dang ïai bteng kaba ktah ïa ka District.
U Dr. Lamare u la ong ba kane ka jingpang mynta ka la don ha kylleng ka jylla Meghalaya. La iathuh ba ki don ki sniang kiba ioh ia katei ka jingpang, ha ka shnong Wapung, ha ka shnong Jalaphet, bad ha ki katto katne ki shnong kiba kham rit. La phah ia ki kynhun ban leit tohkit, bad ki jingpeit bniah hadien ka jingiap ki pyni ba ki sniang ki la iap na katei ka jingpang.
Ka jingpang sniang Africa Swine Fewer kam don dawai bad haduh mynta ym pat don dawai ban iada. Lada ym lah ban tehlakam, kane ka jingpang ka lah ban pynduh ia baroh ki sniang kiba don ha sem baroh kawei; tang ki sniang kiba don ka bor met kaba khlain ki lah ban im. U Dr. Lamare u la antad ba 80–85% na ki mrad kiba shah ktah ki la iap. Ka tnad ka sngewsynei ia ki nongrep kiba la duh ia ki jingri.
Ia ka jingiap jong ki sniang baroh ym pat lah ban tip namar bun ki nongrep kim shym la pyntip sha ka tnad. Kiba bun ki jingtip kiba la ioh haduh mynta ki wan na ki jaka ri sniang kiba kham heh kiba la pynpaw ia ka jingduhnong.
Ki nongri sniang kiba la leit sha katei ka ophis ki dei tang kito kiba la mad ia ka jingiap bun ki sniang jong ki. Ka tnad ka lah ban ai jingiarap pisa, hynrei ki nongri ki dei ban ai ia ki kot ki sla kiba biang ban pynthikna ba ki sniang jong ki ki iap na ka jingpang African swine fever.
Ym don ka skhim siew bai lutksan kaba kyrpang; ka tnad ka ai mynta ïa ki jingpeit bniah ïa ka koit ka khiah bad kiwei kiwei ki jingïarap katkum ka jingdonkam jong ki nongri sniang.
Ka tnad ka ngeit ba ka jingpyntip ka la slem ha kiba bun ki khep. Ki nongri bunsien kim ju ai jingtip haba tang katto katne ki sniang ki iap, ka tnad ka ju pynlong ia ka jingpynsngewthuh shaphang ka biosecurity. Kane ka jingpang sniang ka lah ban wan na ka nongthied sniang kiba na kiwei pat ki jaka kiba poi sha kane ka jaka na ka bynta ban thied sniang, ha kaba ki lah ban kit lang ia katei ka jingpang na kawei ka jaka sha kawei pat.