Ka Jaiñtia Student’s Movement (JSM) ka ai khublei Behdieñkhlam basuk ba kmen ïa baroh ki khun ka Seiñraij Jowai bad kumjuh ïa ka Ri Jaiñtia Ri 12 Daloi hapoh ka bri u Hynñiewtrep u hynñiewskum.
Ka seng ka kitbok kitrwiang lyngba kane ka lehñiam Behdieñkhlam kan long kaba don burom, kaba phuh ba phieng bad kaba dap da ki jingkyrkhu kyrhai na u Trekirot ban dap ban biang ka ïoh ka kot, ka koit ka khiah, ka kamai kajih, ka jingnang jingstad, ka shongsuk shongsaiñ bad ban roi ka jaitbynriew ha ka imlang sahlang.
Ka seng ka kyrmen skhem ba ka jingpyndep ïa ka Behdieñkhlam kan wahrah ruh ka jingïatylli hapdeng ki jaitbynriew bad ban roi ban par ha baroh ki liang.
Shuh shuh ka seng ka ong kane ka lehñiam Behdieñkhlam mynta u snem kan wanrah ïa ka bha ka miat ha ka rep ka riang bad ban lait na ka pang ka shitom bad kumjuh ki kam sniew ba bun jait.
Na ka liang u Publicity Secretary Central Body u samla Heihok Supuh u ong ka jaitbynriew kaba bat bad sumar ïa ka Dustur Riti ka long ka jaitbynriew kaba im ha ki pateng ba dang wan.