(Khot ka Seiñ Raij Jowai ïa u Himanta Biswa Sarma ban wan sakhi lang haka sngi pynkut)
Ka Seiñ Raij Jowai mynta ka sngi Palei ka la pynbna paibah ba ïa ka lehñiam Behdieñkhlam kaba (saw sngi lai miet) mynta u snem 2026 kan sdang naduh ka 6 tarik bad pynkut haka 9 tarik jong u bnai Niatung, 2026. Kumta ka SRJ ka khot ka wer lang ïa baroh ki khun ka ñiamtre, ïa ki nongshong shnong ka jylla bad kiwei de ban wan sakhi lang ïa kane ka Behdeiñkhlam ha nongbah Jowai. Haka sngi kut jong ka Behdeinkhlam, ka SR Jowai ka la khot ruh ia u Himanta Biswa Sarma CM Assam
Ki nongïalam ka Seiñ Raij Jowai naduh u President ma Hercules Toi, General Secretary ma Arwotki Sumer, u Assistant Secretary ma Wyraiki Kharbuki bad u Dolloi ka Elaka Jowai u ma Puramon Kynjing haba kren sha ki lad pathai khubor kila pynsngew ba ka jingpynkhreh ïa ka Behdieñkhlam kala long kaba ïaidbeit ïaidryntih.
U President ma Hercules Toi ula ong ka jingpynkhreh ïa ka shad Behdieñkhlam kala ïaidbeit da ka jingïaraplang naduh ka ophis u DC, ka tnad pulit, ka District Council kala pynbna ïa ka shuti haka 7 tarik, ki bor synshar District kiba la pynbna shuti haka 8 tarik bad kumjuh ka shuti hapoh ka jylla kaba long haka 9 tarik.
Ula kyntu ïa ki nongshong shnong kiba marjan hapoh ka sor Jowai ba kin long kiba ïatreilang ha ka rukom pynïaid ïa ki kali ki mator hapoh kitei ki sngi Behdieñkhlam, khnang ban wanrah burom ïa ka sor Jowai hi baroh kawei bad kan long ka Behdieñkhlam kaba phuh ba phieng.
U Dalloi ka Elaka Jowai ma Puramon Kynjing ula ai khublei ïa baroh ki khun ka Seiñ Raij kiba la ju trei lang na ka por sha ka por ban pyndep ïa ka ñiam ka rukom, ka jingpyndep ïa ka Behdeiñkhlam kan wanrah ïaka bha ka miat ha baroh ki liang, ula kyntu ïa ki paidbah ba kin pynduna ban wanrah ïa ki kali ki mator khnang ban lait na ka jingsahkut kali.
Na ka liang u ma Arwotki Sumer ula pyntip ba ki kam baroh kiba ïaid shakhmat naduh ki nongshah khot sngewbha ba kyrpang kiba kynthup ïa u Myntri Rangbah ka Assam u Himanta Biswa Sarma ha ka sngi pynkut jong ka 9 tarik, ula pynsngew lyngba kane ka Behdeiñkhlam kan wahrah ruh ïa ka jingshongsuk shongshngaiñ hapdeng kine ki ar jylla (Assam-Meghalaya).
Ha kane ka lehñiam Behdieñkhlam na ka liang ki tnad sorkar naduh ka PWD, ka PHE, Police, naduh ka tnad Arts & Culture, Tourism, Planning, NEC kiba la kyrshan lang ha ki jinglut jingsep bad kumjuh na ki bor pynïaid District.
Ha kaba ïadei bad ka jingpynkreh ïaka rukom ïaid ki kali ha kitei ki saw sngi u ma Wyraiki Kharbukhi uba pyntip ïa ki kali kiba wan na Laban ban leit sha ki thaiñ War kin ïaid beit na u surok By-Pass thymmai na Khliehtyrshi sha Tre Iongriang, kiba leit sha liang Ladthadlaboh kin ïaid na u surok Riatmoolaiñ. Kaba ki khun ka ñiamtre kiba leit sha ka shad Behdeiñkhlam kin ïaid na u surok shahtngit sha u surok War (by-pass).
Ha ka sngi pynkut u ma Kharbukhi ula pyntip ka jingpynkhreh ïa ki jaka pynïeng kali paidbah ki long ha madan Jrisaleiñ bad ha Iawmusiang jaka Seiñ Raij, na ka bynta ki nongshah khot sngewbha (invites) ha Mooliksoo, hajan madan Biar ka Blai, madan Tpep Pale shaduh madan ryngkaw.