Ka jingialang jong ka Synjuk Ki Nongsynshar Shnong, bad Synjuk Ki Rangbah Kur ka ba la pynlong ha nongbah Shillong ka la pyrshah jur ia ka Lyngwiar Dkhot Rangbah jong ka Dorbar Thawaiñ Dalariti Rilum Khasi (KHADC) na ka bynta ki artylli ki daw ki ba la iuhroit ia ki riti dustur tynrai, kata ka ba sloit ia ka iktiar jong ki Rangbahshnong bad ka ba len ia ka riti kheiñkur kheiñkha na ka kmie. Hadien ba la iatai sani ki rangbah shnong bad rangbah kur baroh ki la pynsngew ba ki la bynñiaw palat ia ka rukom korbar jong ka Dorbar Thawaiñ Dalariti ka ba la pynkylla mulot lut ia ki riti dustur tynrai. Ha ka ba ia dei bad kane ka dorbar jong baroh ki dorbar shnong bad dorbar kur ki la shim ia ka rai ban dawa ban weng noh ia ka dulir-byrta (notification) ka ba 11tarik Jylliew 2026 ka ba dei halor ka ba tyngkan ban sam ne die khyndew sha ki riewshimet ne sha ki shlem kyntiew imlang sahlang, bad ban pyndam noh ia ka aiñrew ba la tyrwa ban taijlih (amend) da ka ba sloit noh ia ka iktiar jong ki rangbahshnong bad ki Dorbar Shnong.
Ha kane ka jingialang ba la wan shim bynta da ki hajar ngut ki rangbahshnong bad rangbahkur ki la ban jur ba da lei lei ruh kin ym ailad ia kano kano ka iktiar sorkar ba kan iuhroit ia ka riti dustur ka ba la buhti da ki longshwa manshwa naduh kulong kumah. Ki khlieh rangbah na ki Dorbar Shnong bad na ki Dorbar Kur ki la ieng shitylli ba horkit hordang kin ym shah ba kano kano ka iktiar kan thombor ia ka synshar paidbah ka ba la phalang lyngba ki dorbar shnong bad ka ba la trei shitrhem baroh shi katta ha ki ba bun ki liang jong ka imlang sahlang. Da kawei ka sur ki khlieh rangbah ki la kut jingmut ban pynneh ia ka iktiar jong ki Dorabar Shnong, Dorbar Raij bad Dorbar Hima ha kano kano ka liang jong ka ba korbar ia ka khyndew tyunrai jong ki trai nongshongshnong ha jylla, khamtam ha ka thaiñ ka ba dei hapoh ka iktiar jong ka Dorbar Thawaiñ Dalariti Rilum Khasi (KHADC).
Ki nongialam jong ka Synjuk Ki Nongsynshar Shnong ki la kren mardor ba kane ka khep ka dei tang na ki thaiñ jong ka sor Shillong bad markhap Shillong, wat ha ba don katto katne ki ba la wan pynshngaiñ ruh na ki thaiñ ba kham pajih kum na Ri Bhoi, na South West Khasi Hills bad na West Khasi Hills. Jar la katta ka la don ka jingiasyllok lang bad ki dorbar ki waheh shnong bad dorbar ki waheh kur na ka thaiñ Jaintia Hills ruh ha ka ba iadei bad kane ka thong ka ba long kyllum ia ka jylla baroh kawei.
La pyniaid ia ka jingialang da u Bah R L Blah, Saiñpyniar jong ka Synjuk Ki Nongsynshar Shnong bad kiwei kiwei ki ba la kren ki long u Bah Bantylli Nari, Rangbah Shnong Nongrim Hills, Bah R L Kharpran, President, Synjuk Ki Rangbah Kur bad ka jingpynshai halor ki aiñ ki ba dei shaphang ka khyndew bad ka kur la kren sani da u Bah Robert June Kharjahrin, Nongsaidaiñ ba tbit na jylla. U la kyntu ia baroh ki rangbah shnong bad rangbah kur ba kin long ki ba peitngor ia kino kino ki bynta ki ba dei ban pynshong shngaiñ ia kino kino ki kyndon jong ka aiñ ki ba la shna katkum ki aiñ halor ki riti dustur tynrai jong ki Khasi ba naduh kulong kumah kumba la ai pateng da ki longshwa manshwa. U la maham ruh ba ki ba shim kabu ban myntoi shimet ha ka nongrim jong ka aiñ katkum ki riti tynrai dei ban pyrkhing bad the lakam ba kin ym khun ranab sha kiei kiei ki ba long pyrshah pynban ia ki riti dustur.
