Halor ka jingpyntrei ia ka Project, JJM hapoh ka shnong Ialong, ka dong Lutituber Social Welfare Club (LSWC) Ialong hadien ba ka la shem ba ka jingpyntrei ka long kaba shu leh tangdep rukom da ka tnad PHE, RWSS ia katei ka project ka bym iahap katkum ka pisa ba la mang ia katei ka project na ka bynta ban pynpoi um dih sha ki long ïing hapoh shnong poh thaw, kumta ka LWSC kala ujor syndon da ka Public Interest Litigation (PIL) hapoh ka ïing bishar jong ka Meghalaya High Court.
Kane ka jingujor PIL pyrshah ia ka PHE ka mih hadien ba ki dkhot ka LWSC ki la ioh jingtip lyngba ka RTI hadien ba ki nongshong shnong hapoh ka dong LWSC ki khlem ioh shuh ia ka umdih kaba biang wat hadien ba ka PHE, RWSS ka la dep ban pynshisha lyngba ki Certificate ba la pyndep ia kane ka project kaba la mang Rs. 3,57,37,500/- (Lai klur sanphew hynniew lak laiphew hynniew hajar san spah tyngka).
Ha ka jingiadei bad kane ka jingbym lah ban pynioh umdih sha ki nongshong shnong kumjuh sha ki School, ki Anganwadi Centre, ki GP Building, ki Health Centre bad sha ki Asharmshala ki dkhot ka LWSC kila dep ban iakynduh bad ki bor ka District Administration, West Jaintia Hills District na ka bynta ban pan jingiarap halor kane ka kam ha kaba na ka liang ki bor Distrtict Adminstration ruh kila pynlong ia ka jingtohkit (enquiry) lyngba ka spot Inspection bad kila lap ia ki jingshisha, hynrei wat hadien ba la lap ia shibun ki jingbym biang ka jingpyntrei ia kane ka project JJM hapoh ka shnong Ialong haduh mynta ym don kano kano ka jingpynioh umdih kaba biang sha ki nongshong shnong katkum ba dei ban long.