Kum shi bynta jong ka jingpyrshang kaba dang ïaid shakhmat ban pynkhlaiñ ïa ka jingpynkhreh na ka bynta ki jingjia ba sngewsih bad ban pynbha ïa ka rukom ai jingïarap kyrkieh, ka District Disaster Management Authority (DDMA), West Jaiñtia Hills ka la pynlong ïa ka Mock Exercise halor ka jingjia jingkhih jumai ha ka 7 tarik Naitung 2026 ha kiba bun ki jaka.
Kane ka jingleh kilanmet (Exercise) ka long ban bishar bniah ïa ka jingpynkhreh jong ki tnad bapher bapher bad ki tnad ba ai jingïarap kyrkieh, ban pynkhlaiñ ïa ka jingïatreilang hapdeng ki tnad bad ban pynkhlaiñ ïa ka jinglah ban ai jingïarap ha ka por ba khih u jumai ne kiwei kiwei ki jingshah lynshop.
Ïa kane ka mock exercise la pynlong ha St. Paul Secondary School, Mookaswan, ha Office jong u Divisional Soil & Water Conservation Officer, Jowai, ha WK Woodland Hospital, Sabahmuswang, bad ha Kiang Nangbah Government College Playground, Jowai.
Ka jingkilan ka kynthup ïa ka jingpynkynriah ïa ki nongshnong shnong, ka jingwad bad jingpyllait im ïa kiba shah ktah, ka jingai jingïarap ba kyrkieh, ka jingsumar ïa kiba mynsaw bad ka jingkit ïa kiba mynsaw sha ki jaka sumar ba la buh kyrpang.
Ha WK Woodland Hospital, ka jingkilan ka la pynleit jingmut ha ka jingïarap kyrkieh jong ka hospital, kynthup ïa ka jingsumar ïa kiba mynsaw, ka jingpynkynriah ïa ki nongpang bad ka jingïatreilang hapdeng ki nongtrei ka koit ka khiah.
Kum ka jingpynkhreh ïa kane ka jingkilan, la pynlong ïa ka jingai jinghikai ha ka 6 tarik u Naitung, 2026 na ka bynta ki heh sorkar bad ki nongtrei mon sngewbha. Ka jinghikai ka kynthup ïa ki jingbatai shaphang ki lad jingïada na ka ding bad ka jingpyndonkam ïa ki tiar pynlip ding, ka rukom wad bad pyllait im, ka bynta jong ki Pulit ha ba jia kine ki jingjia ba sngewsih, ka jingai jingïarap ba kyrkieh, ki buit wad bad pyllait im bad ka jingpyntip haba jia ka jingjia ba sngewsih.
Ïa kane ka jinghikai la wan ban ai da ki briew jong ka ophis Fire Service & Emergency, ka ophis jong u Superintendent of Police, ka ophis jong ka District Medical & Health Officer, ka Civil Defence bad ka ophis jong ka MPRO, Jowai.
