U Kpa jong u Mewanri O Dkhar u ma Treilem Shylla na ka shnong Nartiang, West Jaintia Hills u la kyrpad ia u khun ban wanphai noh sha la ïing hadien ka jingjah jong u Mewari O Dkhar naduh ka 3 tarik Naitung 2026 bad haduh mynta u khlem pat wan phai ïing shuh.
Na ka Liang u ma Treilem Shylla u la kyrpad ïa la u jong u khun ban wan phai noh sha la ïing bad u la kyntu ruh ba kam don kano kano ka Case pyrshah ia u, kumta u la kyrpad ia u khun u Mewari Dkhar 32 snem ka rta ban wan phai noh sha la ïing.
Haba kren sha ki lad pathai Khubor ha Shillong Press Club u ma Wanshwa Nongtdu Nongaiktien ka MCTODA u la ong ba u Mewari Dkhar u la jah naduh ka 3 tarik Naitung 2026 bad haduh kine ki sngi ruh kim shym lah ioh shuh ia u.
Ka MCTODA ka la pynlong ia ka jingleit wad ia u sha Assam ha ryngkat bad u kpa jong u Mewari Dkhar u Treilem Shylla hynrei ki khlem pat ioh ne lap ïa u wat haduh kine ki sngi ruh.
Nalor kata u Chairman ka MCTODA u bah Moskalandar Marngar u la iathuh ba u kpa jong u Mewari Dkhar u la wan pan jingiarap na ki Dkhot ka MCTODA ban leit wad lem ia u khun jong ki u Mewari Dkhar ha kata ka jingleit wad kim shym la lap bad ki la pan jingiarap ruh na ka ophis jong u SP ka Ri bhoi District bad kumjuh na ki Pulit ka Assam ban pynlong ia ka jingwad ia u Mewari Dkhar hynrei ki Pulit Assam ki la iathuh ba ki la wan ialam ia u sha hospital ka Guwahati Medical College ban phah sumar ia u Mewari Dkhar ha katei ka jaka sumar bad lyngba ki CCTV la lap ba u Mewari Dkhar u lah mih na Hospital hynrei khlam wan phai ïing pat.
Na ka liang u Chairman ka MCTODA u bah Moskalandar Marngar u la kyntu ruh ia ka Sorkar khamtam ia ki bor Pulit ba kin shimkhia ban pynlong ka jingwad ban lap noh ia u Mewari Dkhar uba la jah naduh ka 3 tarik Naitung 2026.
Khatduh na ka liang u Chairman ka MCTODA u bah Moskalandar Marngar u la iathuh ruh ba u Mewari Dkhar u dei u uba niah trok bad kit Star Cement jong ki kali ba nabar jylla bad u kyntu ruh ia kito ki transport ba kin shimkhia lang halor ka jingjah u Mewari Dkhar.
Na ka liang u General Secretary ka MCTODA u Bah Peter Marbaniang u la kyntu ia ka tnad transport ba kam dei ban shu pyndonkam kum ki nuit ia ki paradoh para snam jong ngi bad ki dei ban peit bad ban ai ki jingmyntoi bad lada kim shimkhia ka MCTODA kan sa shong jingialang bad kan sa shim da kiwei ki sien jam.
U la bynrap ka Sorkar kam ju shimkhia da jia ei ei ia u paradoh parasnam hynrei da jia ei ei ia kiba nabar ka Sorkar ka shimkhia mardor bad kyntu ruh ba kan leh ei ei na ka liang ka Sorkar halor ka jingjah u Mewari Dkhar sha jylla Assam.
Na ka liang u kpa jong u Mewari Dkhar u ma Treilang Shylla sa shisien u la kyrpad ia la u jong u khun ba un wan phai noh sha la ïing la sem khlem kano kano ka jingsheptieng.
[ U Mewari O Dkhar, uba la jah naduh ka 3-7-2026 sha Assam bad khlem pat wan poi ïing haduh ba thoh ia ka khubor]