Mynta ka sngi (13/07/2026) ka Meghalaya AIDS Control Society (MACS) kala pynlong ia ka prokram pynsngewthuh sha ki paidbah halor ka jingktah jong ka jingpang HIV/AIDS da kaba ka la pynlong ka ka Roadshow, ha jaka pynieng kali Ummulong ha Iawmusiang, Jowai, West Jaintia Hills District.
Ia kane ka prokram la wan ban plie da ka Emalya Ch. Momin, MCS, Assistant Commissioner kum ka kongsan. ka Dr. Patricia Shylla, District Medical & Health Officer (DM&HO), West Jaintia Hills ruh ka la iadonlang ha kane ka prokram bad kiwei de ki nongtrei jong ka tnad ka koit ka khiah lem bad ki nongtrei na ka MACS.
Ka jingthmu jong kane ka prokram ka long ban pynsngewthuh sha ki paidbah halor ka jingktah jong ka jingpang HIV/AIDS, ka jingioh ia ka jingpang iabit lyngba ka shongkha pathar bad ruh ban batai sha ki paidbah ia ki lad jingiada na kine ki jait jingpang ba shyrkhei. La hikai ba dei ban long kiba kloi dalade hi ban leit phah test na ka bynta ban tip la ki briew ki don ne em ia kane ka jingpang bad ka jingleh test ka long kaba iohei khlem da hap ban siew dor ia kaba lah ban leh ha kylleng ki bynta jong ka jylla.
La hikai pynsngewthuh ruh halor ki lad jingiarap bapher bapher kum ki Integrated Counselling and Testing Centres (ICTCs), ki Anti-Retroviral Therapy (ART) Centre , ki Opioid Substitution Therapy (OST) Centre, ki Link ART Centres, Prevention of Parent-to-Child Transmission (PPTCT) services bad kiwei de kiba don hapoh ka National AIDS Control Programme (NACP).
Ka jingthmu jong kane ka prokram ka long ruh ba ki paidbah kin nang ban burom ia ka hok longbriew man briew jong kito ki lanot kiba la ngat ha une u khniang jingpang HIV ne ki People Living with HIV (PLHIV).
Kum shibynta na ka jingshimkhia halor kane na ka liang ka tnad kan buh ia ka kali ka ban sa iaid kylleng ki bynta jong ka West Jaintia Hills District bad sha kiwei de ki District ha kine ki taiew ban wan na ka bynta ban pynlong ia ka test HIV/AIDS ia ki paidbah ba ruh ban iohlad ban ai ka jingtip ba markhmat ia ki nongshong shnong.
