Ha ka 26 August 2026, u President jong ka MCTODA u bah Moslander Marngar ryngkat bad ki dkhot na ka Jaiñtia Hills district unit, ki la ïakynduh ïa ki transporter jong ka kompeni Amrit Cement bad ki kompeni cement ha East Jaiñtia Hills ban kren halor ka jingeh jong ki nongniah trok kiba niah kali ha kine ki company bad ki transporter.
Haba kren sha ki lad pathai khubor hadien ba la wai ka jingialang, u President ka MCTODA u bah Moslander Marngar u la iathuh ba ki la ia kynduh ia ki katto katne ki kompeni transporter jong ka cement plant , kane ka ka dei ka jingiakhih jong ki drivers kaba la neh haduh shibnai da ki nongniah kali kiba niah kali kompeni cement bad ki kompeni transporter. Ki nongñiah kali ki la pan jingïarap na ka MCTODA. Ka MCTODA Jaiñtia Hills unit ka la ïarap ïa ki nongñiah kali ban pynkhreh ïa ka Memorandum, ïa kaba la ai sha ka ophis jong u Deputy Commissioner ha East Jaiñtia Hills District; la ai ruh ia ki kopi sha ki kompeni cement bad ki kompeni transporter.
Mynta ka sngi ki transporter jong ki kompeni cement ki la khot ia ka jingialang bad ki nongniah kali, kiba la khot ia ka MCTODA ban iadon lang. Katto katne ki kompeni cement ki la pyni ia ka jingiatreilang da kaba ai shuti ia ki nongniah kali. Kiwei pat ki kompeni ki la pyrshang ban pyntieng ia ki nongniah kali, da kaba pynduh mynsiem ia ka jingiakhih da kaba byrngem ban beh kam, ban die ia ki kali, bad kiwei kiwei ki jingma. Namar kane, don ki nongñiah kali kiba la ïoh jingkyrmen katba kiwei pat ki la duh mynsiem. Ka MCTODA ka la pynshlur ia ki nongniah kali ban iai kyrmen bad iaishah, namar ba ka seng hi ka la don ka jingshemphang kaba la slem bha ban iakren bad ki kompeni cement bad ka tip ba ka rukom treikam ka long kaba eh.
U la kyntu ia ki nongniah kali ba kin iai long kawei bad shaniah iwei ia iwei pat ha ka por ba pynlong ia ka jingiakhih, da kaba maham ba ka jingbym iatylli kan pyntlot ia ka kyrdan jong ki. U la ong ba ki don ki kompeni kiba kwah ban pynbeit ia ka jingeh hakhmat u Deputy Commissioner bad don ruh kiba kwah ban iakren shabar jong ka ophis jong u Deputy Commissioner; Lada ki nongñiah kali ki pdiang ïa ka jingtyrwa, ka MCTODA ruh kan pdiang ïa ka; lada kim lah, ka MCTODA kan nym pdiang. U la ai jingmut ruh ia ki nongniah kali ba kin kyntait ia kino kino ki jingtyrwa adhoc na ki kompeni, namar ba ka jingpdiang ia ki kan long ka jingjop ia ki kompeni.
U Sandeep Pradhan, Senior Manager — Operations, ka Amrit Cement, u la ong ba ka jingmih na ka jingialang mynta ka sngi ka long ba ki la pan por hynniew sngi ban bishar bniah ia ki jingdawa jong ki nongniah kali. Ka kynhun aiñ jong ka kompeni kan bishar bniah kino ki jingdawa kiba lah ban pyndep mardor bad kino kiba donkam ban leh shuh shuh. Ki jingdawa ba kongsan ki kynthup ïa ki jingpynbeit ban trei 24 kynta, ki jingeh ha ka tulop, ki jaka leit shabar, bad ka jingïada. U la bynrap ruh ba u la kyrpad ïa ki nongñiah kali ban sangeh noh ïa ka jingïakhih jong ki katba ka jingïakren ka dang ïaid shakhmat.
