U Myntri Rangbah ka Jylla u Conrad K. Sangma mynta ka sngi ka 14 tarik Naitung 2026 u la leit ban jurip ia ki project bapher bapher ban bishar bniah ia ka jingiaid shaphrang jong ki katto katne ki projek pynroi ba kongsan kiba dang shna ha New Shillong.
Ha kane ka jingjurip la don lang u Chief Secretary, u Commissioner & Secretary, ka tnad pynroi sor, ki heh ophisar sorkar, bad ki nongmihkhmat jong ki tnad treikam bapher bapher.
U Myntri Rangbah ka jylla u la leit jngoh ia ka New Secretariat Complex, ka Unity Mall, ka Sports Complex kaba don ha Umsawli, bad kiwei kiwei ki kam pynroi kiba dang iaid shakhmat ha New Shillong.
Ha New Secretariat Complex, u Myntri Rangbah ka Jylla ula bishar bniah ïa ka jingstet jong ka jingtei bad ban jur ïa ka jingdonkam ban pynneh ïa ka kyrdan kaba ha khlieh duh jong ka jingbha bad ban pynthikna ban pyndep ha ka por kaba biang. Shisien ba la dep, ka Secretariat kan long kum ka jaka kaba biang tam, kaba pynïasoh lang ïa ki tnad sorkar hapoh kawei ka tnum ban pynbha ïa ka jingïatreilang, ka jingtreikam kaba paka.
U Myntri Rangbah ka Jylla u la jurip ruh ïa ka jingpyntrei ia ka Unity Mall, ka projek kaba pawnam kaba thmu ban pynbiang ïa ka jaka ba kyrpang na ka bynta ki nongtrei kti, ki nongthaiñ jain, ki nongseng kam seng jam, ki kynhun ïarap ïalade, bad ki nongpynmih mar kiba napoh ka jylla ban pyni bad pynïaid iew ïa ki. La khmih lynti ba kane ka projek kan kyntiew ia ki kam khaïi, ban pynkhlaiñ ia ka kam jngohkai pyrthei, bad ban thaw ia ki lad kamai kiba lah ban neh.
Haba bishar bniah ïa ka Sports Complex ha Umsawli, u Myntri Rangbah ka Jylla u la pynpaw biang ïa ka jingangnud jong ka Sorkar ban tei ïa ki jaka ïalehkai kiba long ha ka kyrdan jong ka pyrthei na ka bynta ki samla ka Jylla. Kane ka complex kan ai ki jaka ai jinghikai bad ki jaka ïalehkai kiba mynta, kan ïarap ban pynroi ïa ki sap ïalehkai bad ban pynskhem shuh shuh ïa ka Meghalaya kum ka pdeng na ka bynta ki jingïalehkai ha kane ka thaiñ.
La pyntip ruh ha u Myntri Rangbah ka Jylla halor ka jinglong jingman jong kiwei pat ki jingtei kiba dang ïaid shakhmat ha kylleng ka New Shillong Township. Ha ka jingbishar bniah, u la bthah ïa baroh ki tnad pyntreikam ban pynthikna ïa ka jingïatreilang kaba jan, ban bud ïa ki kyndon bad ban pynsted ïa ka jingtei ryngkat ki kyndon jingïada.
Haba kren ha kane ka jingleit jngoh, u Myntri Rangbah ka Jylla ula pynpaw ba ki projek kiba dang pyntrei ha New Shillong ki buh ïa ka nongrim na ka bynta ka lawei jong ka Jylla Meghalaya. U la kdew ba ka jingbei tyngka ha ki jingtei ba mynta jong ka synshar khadar, ka khaïi pateng bad ki kam ïalehkai kan ym pynbha tang ïa ka jingsynshar bad ki jingshakri paidbah hynrei kan pynmih ruh ïa ki lad kamai, kan thaw kam thaw jam bad kan kyntiew ïa ka jinglong jingman jong ki nongshong shnong ka Jylla.
Ka Sorkar Meghalaya ka dang iai bteng ban pynthikna ban pyndep ha ka por kaba biang ia kine ki projek khnang ba ki nongshong shnong kin ioh jingmyntoi kaba biang tam.
