Ka Umsning Block Headman Forum (UBHF ) kaba peit bad khmih ia kumba 200 tylli ki shnong ha Umsning C&RD Block ha ka 16 tarik Naitung2026 ka la wan ban kynduh ia u Myntri ba khmih ïa ka tnad Bording u Bah Metbah Lyngdoh ban pynsngew halor ka jingkynduh jingeh ki paidbah nongshong shnong kiba hap ha ka Umsning C& R D Block halor ka jinglip bording ba khah khah ha katei ka thaiñ.
Haba kren sha ki lad pathai khubor u President ka Umsning Block Headman Forum u Bah Frankie Nongrum u la ong ka kynhun ka la pynsngew bad kyrpad ïa u Myntri ba khmih ïa ka tnad Bording ban buh noh da ka 33/11KV Substation ha Umsning na ka bynta ban pynduna ïa ka jinglip ba khah khah ka Bording ha ka thaiñ Umsning.
Kumta u la pynpaw bad kyrpad ia ka Sorkar jylla lyngba u Myntri ba khmih ia ka Bording u Bah Metbah Lyngdoh ba kan sngap ia ka jingdawa ka kynhun ban buh noh ia ka lain 33/11 KV Station ha Umsning khnang ba kan long ka jingkyrkhu ia ki paidbah nongshong shnong ka Umsning kiba im da kaba kamai kajih da ka bording, namar ka jinglip bording ka ktah ia ioh ka kot bad da ka jingbiang ka bording kan kyntiew ia ka ioh ka kot ia ka kamai kajih bad kan long ruh ka jingkyrkhu ia ki paidbah nongshong shnong.
