Ka jinghiar dor u kubi ha kine ki khyndiat bnai ba lah dep ka wanrah jingeh ia ki nongrep ha kaba ka la poi shaduh u pud ban pynlong ïa ki nongrep ban sam ei syndon sha ki paidbah hadien ka jinghiar dor palat u kubi.
Ha ka 16 tarik Naitung 2026 ki nongrep na ki thaiñ Smit ba hap ha ka Mawkynrew Konstituensi ki la pynlong ia ka jingsam ei ia u kubi ha phyllaw jong ka State Central Library Shillong hadien ba ki nongrep ki la ud ba ka dor u kubi ka poi tang 2 tyngka shi kilo bad kam don jingmyntoi shuh namar ka jingpynlut bad ka jingmih kam ïahap shuh kumta ka pynlong ia ki nongrep ban sam ei syndon ia u kubi sha ki paidbah.
Haba kren bad ki lad pathai Khubor u Bah Commander Shangpliang, President ka Hill Farmer Union (HFU) u la ong ba kum u nongialam jong ki nongrep haba ula ioh ban leit jurip sha ki lyngkha jong ki nongrep ka long ka jingsngew rem bad ka jingsngewsih kthang ban tip ba u kubi uba ki nongrep kila rep shitom kin die tang 2 tyngka shi kilo.
Ula pynpaw ba ka dor jong u kubi haba ki wan thied na ki nongrep ka long tang 2 tyngka shi kilo kumta kam don jingmut shuh ïa ki nongrep ban die namar ka jingmih bad ka bai trei kam ïahap shuh nalor kata ki hap ban siew ïa ka bai kali, bai kit bad bai bylla bad ruh baroh ki nongrep kim lah shuh ban siew ia ka ram ba ki la shim.
“Ki nongrep ban ia kaba iohi ia ki mar jong ki ba kin shu pyut ka long ka jingthang kaba khraw ia ki namar ba ki la rep bad trei shitom da ka um syep kumta kila rai ban shu sam bad ai sngewbha ei noh sha ki paidbah nongbam”, ong u bah Commander.
