Katkum ka jingkheiñ ba la phah lyngba ka ophis u Deputy Commissioner (Election), East Jaintia Hills haduh ka 20/07/2026 la iathuh ba ka jingsam ne ka jingpynpoi ia ki Enumeration form jong ka Special Intensive Revision (SIR) sha ki nongthep vote ka East Jaintia ka la kot sha ka 99,465 tylli lane 95.26 % na ka jingdon jong ki nongthep vote ka District 1,04,417 ngut.
Napdeng kine ki form ba la dep sam la lah ban pynrung hapoh ka thup haduh 75,095 tylli ki EF lane 71.92 %.
Ha 5-Sutnga Saipung (ST) Assembly Constituency la sam 51,594 tylli ki form (99.30%) bad la pynrung 36,022 tylli (69.33%) bad ha 6-Khliehriat (ST) Assembly Constituency la sam 47,871 tylli ki form (91.25%) bad la lah ban pynrung 39,073 tylli (74.48%).
Na ka liang ki bor pyniaid Election ka District ka dang bteng ban phah leit rung sha man la ki thliew ïing ban pynthikna ba baroh ki nongthep vote kin rung lut haduh ba kut ka SIR. La kyntu ruh ia kino kino ki nongthep vote ki bym pat ioh ia ki form lane ki bym pat pynbiang ia ki jingdonkam ba ki dei ban leh kloi da kaba ia kynduh ia ki Booth Level Officer (BLO) lane ki Electoral Registration Officer (ERO) jong ki.