Ka Hynniewtrep National Youth Front (HNYF) hapoh ka jingïalam u Tyllibor Swer, General Secretary ka HNYF Central Body bad u Damechwa Syrti, General Secretary ka HNYF, Eastern Region, ryngkat bad ki dkhot jong ka seng ha ka jingdonlang u bah Sadon Blah President Rangbah ka HNYF, mynta ka sngi 21 tarik Naitung ki la aiti ïa ka jingthoh (Memorandum) sha ka ophis u Deputy Commissioner ka West Jaiñtia Hills District.
Ha katei ka jingthoh, ka HNYF ka la pynpaw ba ka Elaka Labang Nangphyllut ka dei kawei na ki Elaka kiba la shah iehnohbeiñ la slem ha Jaiñtia Hills. Kane ka Elaka ka kynthup ïa 22 tylli ki shnong, ha kaba bun na ki nongshong shnong ki im hapoh u line jong ka jingduk (Below Poverty Line).
Ka seng ka la ong ruh ba namar ba kane ka Elaka ka don ha khappud bad ka Karbi Anglong, bun na ki nongshong shnong kim don satia ïa ki kot ki sla kiba pynshisha ïa ka jinglong nongshong shnong ne jingïoh bynta ha ka jylla. Kumta kim don ia ki EPIC, Aadhaar Card, MHIS, Ration Card bad kiwei pat ki kot ki sla kiba donkam ban ïoh jingmyntoi na ki skhim bapher bapher jong ka Sorkar jylla. Nalorkata, ka Elaka ka dang duna ruh ia ki skul kiba biang bad kam don satia ïa kino kino ki Community Health Centre (CHC) lane Primary Health Centre (PHC).
Ka HNYF ka la pynkynmaw ba ha ka 8 tarik Naiwieng, 2023, ka Jaiñtia Hills Autonomous District Council (JHADC), lyngba ka shithi No. JHADC/Pol/23/2021/6, ka la pyntip paidbah ïa ka jingthung ïa u Prolin Samayang kum u Acting Dolloi ka Elaka Labang Nangphyllut.
Hadien kane, ka JHADC ka la ai ruh ïa ki Sanad sha ki 22 ngut ki Waheh Shnong jong ki shnong kiba hap hapoh katei ka Elaka. Kane ka la pynsuk ïa ka rukom pynbeit bad pynrung kyrteng ïa ki nongshong shnong jong katei ka thaiñ.
Namarkata, ka HNYF ka la kyrpad ïa ka Election Department jong ka District ba kan pynjlan ïa ka Special Intensive Revision (SIR) sha ki nongshong shnong jong ka Elaka Labang Nangphyllut, khnang ba kin ym shah iehnoh ha ka jingïoh jingmyntoi na ki skhim sorkar bad ruh ba kin lah ban shim bynta pura ha ka rukom synshar paidbah jong ka ri India.
Na ka liang ki bor ba dei peit ha ophis u Deputy Commissioner, kila ai ka jingkular sha ka HNYF ba kin shimkhia ïa kane ka kam bad ban leh ïa kaba donkam.
Ka HNYF ka pynpaw ïa ka jingkyrmen ba ka ophis u Deputy Commissioner, West Jaintia Hills kan shim ïa ki sienjam kiba donkam ban pynurlong ïa kine ki jingdawa.