Ka Jaintia National Council (JNC), Khliehriat Circle, mynta ka sngi ka la leit ïakynduh ia u Deputy Commissioner ka East Jaintia Hills ban bud dien ia ka jingujor jong ka seng halor ka skhim Supplementary Nutrition Program na ka bynta ki khynnah bad ki longkmie.
Ka seng kala pynshai ruh ba ka jingthmu jong ka, kam long ban kynnoh ïa ki Anganwadi Workers lane ban khang ïa kino kino ki Anganwadi Centres, ka jingthmu ka seng hi ka long ban lap ïa ka daw kaba shisha jong ki jingeh kiba ktah ïa ka jingtreikam jong ka ICDS bad ka SNP. Da kaba pynkynmaw ruh ia u DC ba lyngba ka jingïoh jingtip ha ka por ba ki ïakynduh bad ka Child Development Project Officer, Khliehriat, kaba iathuh ba ïa ka indent la ioh tang shisien ha ka lai bnai. Hynrei, katkum ka thong jong ka Supplementary Nutrition Programme ka long ban ai jingbam 25 sngi man u bnai bad 300 sngi ha ka shi snem.
Ha ka jingiakynduh bad u DC, u la kular hakhmat ka seng ba un sa shimkhia ia kane ka kam bad la kular ruh ban thung daka inquiry Committee ban peit bniah iaka kam, ka seng ka pynpaw ïa ka jingsngewnguh halor ka jingkloi jong u ban thaw ïa ka Inquiry Committee halor ki mat kiba ïadei bad ka Khliehriat ICDS Project.
Halor kane, ka kynhun ka la buh ruh ka jingkyrpad ïa ka Inquiry Committee ban peit bniah la ka rukom pynpoi mar bam kaba long shisien ha ka lai bnai kan wanrah ne em ïa ki jingeh ha ka jingpyntrei ïa katei ka thong, bad lada ka daw kaba shisha ka don ha ka rukom sam ne pynpoi mar, ka jingkhang ïa ki Anganwadi Centre kan ym lah ban pynbeit ïa ka jingeh hynrei kan shu pynduh noh ïaka hok jong ki khynnah, ki longkmie ba armet kiba ki dei hok ban ïoh.
Ha kaba kut, ka JNC-KC ka la ban jur ba ka jingthmu jong ka kam long ban pyntlot ïa ka ICDS hynrei ban pynkhlaiñ ïa ka, khnang ba ki jingmyntoi jong ka SNP kin poi sha baroh kiba dei hok ban ïoh.