Ka samla Aishwariya Malang kaba shong ba sah ha Khliehïongriang Jowai, hadien ka jingjop jong ka ïaka Miss Teen Diva 2026 kaba la pynlong na nongbah Jaipur naduh ka 11-19 Naitung 2026, kaba la ïoh lad syndon ban mihkhmat ïa ka ri India haka kyrdan jong ka Miss Teen Earth India 2026.
Ka samla Aishwariya Malang mynta ka sngi Balang kala wan sha Jowai bad la pynlong ka jingpdiang burom ïaka naduh jingkieng Myntdu shaduh Khliehïongriang ka jaka sah jong ka haba la pynlong ïaka jingïalang leh burom da ka shnong, kiba ha ïing ha sem, ki lok ki jor bad kiwei de.
Na ka liang ka shnong kala pynpaw ka jingsngewnguh kaba khraw ïa katei ka khun samla jong ka shnong kaba la wanrah burom ïaka jylla Meghalaya hi baroh kawei, ha kaba la ot ruh ïa u cake kum ka dak jong ka jingkmen.
Na ka liang ka samla Aishwariya Malang haba kren sha ki lad pathai khubor kala pynpaw ka jingkmen kaba khraw halor ka jingïoh lad jong ka ban ïashim bynta ha kane ka jingïakhun hapoh ka Ri kaba la pdiang ïa ki samla naduh 13-19 snem ka rta.
“Kila don shibun ki jingeh ha ka jingïakhun, hynrei da ka jingtrei shitom nga la poi sha ka thong jong ka jingjop bad kine baroh dei na ka jingkyrshan na kina bun balang”, la ong ka samla Aishwariya Malang. Shuh shuh kala ai mynsiem kumjuh ïa kiwei de ki para samla ba kin pynleit jingmut bha ïa kaei ka thong kaba ki don tad haduh ban da ïoh ka jingjop.
Haba pynkut kala ai khublei kyrpang ïa baroh kiba don bynta ban ai jingïarap ïa ka naduh kaba sdang haduh ba kut.