U Bah Lektor Dkhar uwei na ki nongtrei mon sngewbha haba kren sha ki lad pathai khubor ha ka 24 tarik Naitung 2026 u la pynpaw sha ka Sorkar ba kan sngap lang na ka bynta ka jingdawa ka sur u paidbah na East Jaintia Hills ban buh ia ka Food Corporation of India (FCI) Depot ha East Jaintia Hills.
U bah Lektor u la pyntip ha u snem 2025 u la phah da ka jingthoh sha u Myntri Rangbah ka Jylla bad kumjuh sha u Myntri ka tnad FCI ba la donkam ban buh noh ia ka FCI Depot ha East Jaintia Hills khnang ba kan nym don kano kano ka jingthut haba iadei bad ka jingsam khaw sha ki paidbah jong ka East Jaintia Hills.
Shuh shuh u la ong ka Sorkar ka la sngap ia kane ka jingpynsngew ban buh noh ia ka FCI Depot ha East Jaintia Hills kaba dei kawei na ki district kaba don marjan bad ki shnong khappud. Hynrei kaba sngewsih ka long ba haduh mynta ym pat shym la iohi ia kata ka FCI Depot ha East Jaintia Hills.
U bah Lektor u la pynsngew ruh ia kane ka mat sha u MLA u bah Kyrmen Shylla bad na ka liang u bah Kyrmen Shylla u la pyntip ba un sa buddien bad pynsngew sha ka Sorkar halor kane ka bynta. Kane kam dei ka mat Seng Sain Pyrthei, kam dei ka mat shimet jong u wei u briew hynrei kane ka dei ka jingdawa kaba mih na ki paidbah baroh bad ka jingdawa na ka bynta ka longïing baduk ki nongioh jingiarap lyngba ka Public Distribution System (PDS) ki nongrep, ki nongkit mar, ki nongniah kali bad baroh kiba shaniah ha ka jingsam khaw paidbah.
Nalor kata u la bynrap ka East Jaintia Hills ka long ka district kaba kongsan eh ha Meghalaya, ki don bun ki karkhana, u pud u sam bad ka Jylla Assam bad ki don bun ki shnong kiba jngai hynrei haduh mynta ka district ka dang sahdien haba iadei bad ka jingdon ia ka FCI Depot bad mar ba wan u khaw paidbah dang hap ban wanrah na ki jaka kiba jngai, kaba pynslem ia ka jingiasam khaw hapoh ka District, ka ba wanrah ia ka jingpynlut bun ka pisa paidbah bad buh jingeh ia ki paidbah.
Khadduh eh u bah Lektor ha ryngkat bad ka sur u paidbah ka East Jaintia ki kyntu ia ka Sorkar khamtam na u Myntri Rangbah ka Jylla u Conrad K Sangma bad kumjuh u Myntri ka tnad FCI ba kin shimkhia ban buh noh ia ka FCI Depot ha East Jaintia Hills, kaba dei ka hok jong ki nongshong shnong ka District.
