Kum shi bynta jong ka jingialap MP By-Election, u Symbud Myntri Rangbah ka Jylla, ma Sniawbhalang Dhar, u la iakynduh ia ki nongialam bad ki dkhot jong ka Niamtre Raid Nongjngi ban pan ia ka jingkyrshan na ka bynta u kyrtong ka NPP, Dr. DRL Nonglait.
Haba kren ha ka jingïalang, u ma Dhar u la ban jur ba kane ka ilekshon ka dei ka kabu ban pynkhlaiñ ia ka jingiatylli, ka shongsuk bad ka roi ka par jong ka Meghalaya. U la kyntu ia ki paidbah ban ieng lang khlem da pyniakhlad, bad ban jied ia u nongialam uba lah ban rah ia ka sur jong ka jylla sha Parliament.
U la ong ba ka Meghalaya ka don ka bor bad ka lad ban kiew hynrei ka donkam ia ka jingiatylli hapdeng ki paidbah, ki shnong, ki jaitbynriew bad ki niam bapher bapher. “Haba ngi ieng lang kum kawei ka jylla, ym don kano kano ka jingeh kaba ngim lah ban pynjop. Ka jingiatylli ka long ka nongrim jong ka roi ka par bad ka jingshngaiñ jong ki paidbah,” la ong u ma Dhar.
Ha ka jingkren jong u, u ma Sniaw u la ai khublei ia ka Niamtre Raid Nongjngi bad u la kular ban trei da ka jingkitkhlieh na ka bynta ka jingmyntoi jong ki paidbah, ka bha ka miat jong ka jylla bad ka lawei kaba kham phyrnai jong ka Meghalaya.