Mynta ka sngi Saitjaiñ, 25 tarik Naitung 2026, ka National People’s Party (NPP) ka la pynlong ïa ka jingïalang paidbah bad ka jingïalap elekshon shiteng samoi na ka bynta ka Shillong Parliamentary Constituency ha Elaka Sutnga Dorbar Hall ha East Jaiñtia Hills District.
Ha kane ka jingialang la don lang ka MLA ka Sutnga‐Saipung ka kong Santa Mary Shylla, u Symbud Myntri Rangbah ka Jylla u bah Sniawbhalang Dhar; U kyrtong jong ka NPP u Dr. D.R.L. Nonglait; Ki MDC ka JHADC na ka seng NPP; u Dolloi; ki heh jong ka seng; ki riew paidbah; ki nongkyrshan; ki nongtrei jong ka seng; ki nong shong shnong; bad kiwei kiwei.
Kane ka dei ka jingïalang paidbah kaba nyngkong eh jong ka NPP ha ka East Jaiñtia Hills na ka bynta ka elekshon shiteng samoi MP.
U Dr. D.R.L. Nonglait u la pynpaw ia ka kam jong u, ka jingnang jingstad jong u ha ka kam, bad ka jingtreikam jong u. U la ong ba u la iakynduh ia baroh arngut ki Deputy Chief Minister bad u Myntri Rangbah ka jylla Meghalaya shwa ban rung sha ka party ban iakren ia ki mat kiba donkam ban shimkhia bad ban tyrwa ia ki polisi treikam na ka bynta ka jylla. U la bynrap ruh ba kine ki nongïalam ki la sngap ïa u bad ki la pynshlur ïa u ban ïatreilang bad ki. Hadien katto katne sien ba u la iakynduh ia ki nongialam ka NPP, u la rai ban pyniasoh ialade bad katei ka seng.
Ka motto jong u Dr. Nonglait ka long “Ban pynbha, ban pynshai bad ban tei” U la ong ba u wan na ka longiing kaba duk bad ba da ka jingshaniah bad ka jingangnud, ym don pud ia kaei kaba lah ban ioh. U la batai ba u la rung ha ka sain pyrthei ym na ka bynta ka jingmyntoi shimet u dang don ha ka kam bad u la jan ioh penshon hynrei namar ba u kwah ban shakri ia ki paidbah bad ia ka jylla, kaba la pynlong ia u ban iakhun ia ka elekshon MP shiteng samoi na ka jingkhlad noh u Dr. Ricky J. Syngkon.
U Symbud Myntri Rangbah ka Jylla u bah Sniawbhalang Dhar u la ïaroh ïa ka jinglah jong u Dr. Nonglait, u la kren ruh shaphang ka longïing longsem kaba khlaiñ jong u Dr. Nonglait, da kaba ong ba ka jingïatylli ka sdang na ïing bad ka NPP ka sngew sarong ban don kum une u briew ha ka party. U la niew ïa u Dr. Nonglait kum uba sbun bad ong ba watla u la jan shongthait hynrei u Dr. Nonglait u la pdiang ïa ka jingkitkhlieh ban ïakhun na ka bynta ka bha ka miat jong ka imlang sahlang. U Dhar u la bynrap ruh ba ban rung ha ka sainpyrthei kam dei ka rai kaba suk.
U ma Dhar u la pynpaw shuh shuh ba ha kine ki por ba u don ha ka kam saiñ hima sima, ka Sutnga‐Saipung ka dei tang ma ka, ka konstitwensi ha kaba u la buh ïa u maw nongrim na ka bynta ka skhim kaba shongdor palat ₹400 klur. U la ong ba ₹400 klur na ka bynta kawei ka konstitwensi kam dei ka pisa kaba rit bad ba ka MLA ka Sutnga‐Saipung ka la ïai bteng ban ïasaid na ka bynta ka roi ka par, kaba la pynlong ïa ka sorkar ban tyrwa ïa ki lad jingïarap na ka bynta katei ka thaiñ. U la kdew ba ka Saipung ka dang duna ha ka roi ka par ha ki katto katne ki bynta.
Ka kong Santa Mary Shylla ka MLA ka Sutnga‐Saipung ka la ong ba naduh ba ka la shah jied kum ka MLA ka NPP ka la wanrah bun jait ki kam pynroi ha ka thaiñ. Ka la ai ka jingiaroh ia u Deputy CM u Bah Sniawbhalang Dhar ba u dei u briew uba kham duna ka jingkren bad kham bun ha ka kam. Ka la kdew ba la palat 12 snem ym shym la don ka surok kaba biang ha ka thaiñ Sutnga‐Saipung, hynrei hapoh ka sorkar ba mynta ba la ïalam da ka NPP ka la sdang ka jingpynroi. Ka la ai ruh ka jingïaroh ïa u Myntri Rangbah ka jylla u Shri Conrad K. Sangma uba la trei shitom ban pynbiang ïa ka pisa na ka sorkar pdeng bad ban wanrah ïa ka roi ka par ha ka jylla. Ka kong Santa ka ai khublei ia u Dr. Nonglait uba wan ban jngoh ia ka Constituency jong ka mynta ka sngi.
