Ka jingialehkai football jong ka 3rd Division kaba pyniaid da ka East Jaintia Hills District Football Association (EJHDFA) ka la sdang hynne ka sngi 27/07/2026 ha Madan ialehkai football jong ka EJHDSA Deinchynrum ha kaba ka Cham Cham SCSC ka la pynjem khnap ia ka Umlawang da 5 Kol la 0, ka Lumputhoi Sc ka la thep 3 kol la 0 ia ka Kuliang YWSC bad ka Nongkhlein Sc Huroi ka la thep 1 Kol la 0 ia ka Iongkaluh SCSC.
Ia ki 2 Kol ka Cham Cham la thep da u Wanme Phawa ha ka minit kaba 21 bad 28, ia ka kol kaba 3 la thep da u Riki Phawa ha ka minit kaba 35, ia ka kol kaba 4 lathep da u Shibun Khaii ha ka minit kaba 56 bad ia ka kol kaba 5 la thep da u Wikris Phawa ha ka minit kaba 65.
Ia ki 3 kol jong ka Lumputhoi pyrshah ia ka Kuliang la thep da u Deimonme Lyngdoh ha ka minit kaba 30, u Tony Lyngdoh ha ka minit kaba 50 bad ia ka kol kaba lai la thep da u Sa-o Lyngdoh ha ka minit kaba 72. Katba ha ka jingialeh hapdeng ka Nongkhlein Sc Huroi bad ka Iongkaluh Scsc, ka Nongkhlein ka la thep shikol la not ia ka Iongkaluh bad ia ka shikol jong ka Nongkhlein la thep da u Seven Pyrtuh ha ka minit kaba 80+4 minit.
Ka jingialehkai ka long kaba itynnat bad kaba pynkmen ia ki nongpeitkai lyngba ki sap ki phong (Energetic talent) kaba pyni da ki nongialehkai. Ha kane ka sngi nalor da ki spah ngut ki nongpeitkai la ia donlang ruh u ma Ehiwot Shadap, ma James Sutnga, ma Niyoo Sympli, ma Wilbert Nongtdu bad kiwei de ki riewkhmat ka thain.
