Mynta ka sngi ka 28 tarik u bnai Naitung 2026, ki nongñiah kali kiba kit mar ia ka Star Cement ha East Jaiñtia Hills District ki la ïakynduh ïa ka Meghalaya Commercial Truck Owners and Drivers Association (MCTODA) ban pan jingïarap bad ka hok na ka bynta ki jingiuh roit jong ka Star Cement ia ka hok jong ki, kaba la ktah ïa ki nongñiah kali jong ki kompeni bad ki nongñiah kali trai ri ruh.
Haba kren sha ki lad pathai khubor, ki nongñiah kali ki la ong ba ki ju pyntip bunsien sha ka kompeni ïa ki jingeh jong ki, bad la buh jingthoh ïa kiba bun ki jingeh jong ki, hynrei ka kompeni kam shym la pynbeit ïa ki. Namar ba ka kompeni ka la iehnoh ia ki, ki la pan jingiarap na ka MCTODA ban pynpaw ia ki jingeh jong ki. Ki nongñiah kali ki la ong ba kim ju kyntait ban kit ia ki mar ne ïa ki jingkyrpad ban leit buh ia ki mar, wat la ka long shano shano ruh.
Ki nongniah kali ki la kynnoh ba ka kompeni ka phah beit ia ka pisa na ka bynta ki jingleit jingwan sha ki bank account jong ki, kaba bunsien kam ju poi haba ki don sha jngai. Ki la kylli kumno ki dei ban bam ha ki por leit trip haba ki jingsiew ki slem. Ki nongñiah kali ki la ong ba ka kompeni kam shym la sngap ia ki jingujor jong ki.
Ki la dawa ba ka kompeni kan siew tulop ia ki bad ban ai ia ka bai leit bai wan da ka pisa ha ka jaka ban siew pisa ha ki bank. Ki nongñiah kali ki la ong ruh ba ka kompeni ka ju kular ban siew “hapoh 10 minit,” hynrei kata ka jingpynslem teng teng ka neh haduh ar sngi. Ki ioh tang ₹750 shisngi na ka bynta ka bam; don ki nongñiah kali kiba ïoh ïa kane ka bai lutksan, katba kiwei pat kim ïoh. Ki nongñiah kali ki kyntu jur ba ka kompeni ka dei ban pynpoi ïa ka bai bam bad bai trip ha ka por kaba biang.
Mynta ki nongñiah kali jong ka Star Cement ki ieng ha Kong Ong hajan ka jaka talasi jong ki pulit, ha kaba la kynnoh ba ki pulit ki dawa ₹500 na uwei pa uwei u nongniah kali shwa ba kin lah ban iaid. U wei na ki nongñiah kali u la buh jingkylli balei kum ki trai shnong ki hap ban siew ïa kane ka pisa sha ki Pulit; Ki nongñiah kali ki la ong ba kim lah ban siew ïa ka bai Pulit namar ba ka bai trip ka long kaba duna bha tang kumba ₹2,500 na ka bynta kawei ka trip.
La shi taiew mynta ki nongñiah kali ki la pynïeng ïa ki kali jong ki ha rud surokbah Kong Ong. Ki pyrshang ban wad jaka ieng kali khnang ba ki nongleit nongwan ha surok bah kin ym shah ktah; ka kompeni ka la ong ia ki ban ieng kali ha rud surok, hynrei ki nongniah kali ki kwah ban pynneh ia ka jinglong ryntih bad ki kwah ia ka jingieng kali kaba biang. Ki la ong ba kin siew ia ka bai talasi Pulit lada ka kompeni ka ai ka jingsiew kaba biang, hynrei kin ym lah ban siew namar ka rit palat ka jingioh jong ki.
Ki dkhot ka MCTODA na ri lum Jaiñtia ba kynthup ia u bah Shanbor Suchiang, u bah Heibor Pariat, bad u bah Ardon Talang ki la leit ban ia kynduh ia ki nongniah kali mynta ka sngi ha ophis treikam jong ki ha ka shnong Nongsning ban sngap ia ki jingujor.
U bah Shanbor Suchiang, General Secretary jong ka MCTODA’s Jaintia Hills unit u la iathuh ha ki lad pathai khubor ba ka seng ka la kyndit ban iohi ia kiba bun ki nongniah kali. Ki nongñiah kali ki la ong ba kim lah ban weng marwei ïa kine ki jingeh. Ka kynhun ka la pyntip sha ka CEC jong ka MCTODA bad ka CEC ka la ai bor ïa ka kynhun jong ka Jaiñtia Hills ban ïarap. Ka MCTODA kan thoh ia ka jingthoh sha ka bor synshar bad kan aiti ia ka shithi jong ki nongniah kali sha ka tnad ba dei peit. U la bynrap ba ka kompeni ka pyndonkam bakla ia ki trai shnong na ka bynta ka jingmyntoi jong ka.
Ka kompeni kam pynmih tang ia u Cement bad u cCinker hynrei ka pyniaid ruh ia la ki jong ki trok, kaba ki nongniah trok ki ong ba ka kompeni ka pyrshang ban pyniaid hi dalade ia baroh bad ban kyntait ia ki nongkit mar trai ri. Ka MCTODA hi ka la don jingeh bad ka kompeni: 7 tylli ki kompeni cement ki la kular ban kit mar 40 tylli ki trok ha ka shisngi hynrei ka la ai tang 30 tylli.
U bah Ardon Talang uba dei u Adviser jong ka MCTODA’s Jaintia Hills Unit u la ong ba ka seng ka ju kyrshan ia ki nongniah kali kiba donkam jingiarap bad kan iarap mynta ruh kumjuh. Da ka jingbit na ka Central Executive Committee, ka MCTODA kan iarap ia ki nongniah kali trai ri. U la kyrpad ia ka jingiatylli bad ka jingiaishah, da kaba kyntu ia palat 200 ngut ki nongniah kali ban ieng tylli khnang ba kin lah ban weng ia katei ka jingeh da kaba suk. Khlem ka jingiatylli, u la ong, ka long kaba eh ban ialeh pyrshah ia kum kine ki jingeh. Ki nongñiah kali trai ri kiba shah ktah ki kynthup ïa ki briew na Jaiñtia, Khasi, bad kiwei kiwei ki jaidbynriew.
