Ka Public Health Engineering (PHE) West Jaiñtia Hills District mynta ka sngi ba ar kala pynlong ïaka prokram ‘Jal Arpan Diwas, Stop Diarrhoea Campaign bad Har Ghar Jal Declaration & Certification’ ha ka jingïalang bala pynlong ha shnong Sohkha Mission.
Ha kane ka prokram la wan ïashim bynta da ki heh ka tnat PHE, ki khlieh nongïalam shnong, ki dkhot ka Village Water & Sanitation Committee (VWSC), ki nonghikai, ki samla pule bad ki nongshong shnong ka thaiñ.
U Sokima Najiar, Executive Engineer ka PHE haba kren halor ka Jal Arpan Diwas ula kdew ïa ka jinglah ban pynbiang ïa ka umbam umdih ha katei ka thaiñ. Ula pyntip ba ka Sohkha Combined Water Supply Scheme, kaba la mynjur nyngkong kumba ₹81 lak ha u snem 2006, hadien la pynheh ïaka hapoh ka Jal Jeevan Mission ha u snem 2020 haka jinglut kaba palat ₹1.31 klur kane ka projek kala kynthup haduh 196 tylli ki longïing kiba ïoh um dih.
Shuh shuh ula kyntu ïaka VWSC bad ki nongshong shnong ban sumar ïa ki tyllong um, ki pipe um bad kiwei de ki jingdonkam khnang ba kane ka skhim kan neh slem. Ula kyntu ruh ïa ki bor pynïaid shnong ba kin ai jingtip sha ka tnad halor ki kam shna surok, ki kam jngohkai pyrthei bad kiwei kiwei ki kam pynroi kiba lah ban ktah ïa ki pipe um, nalor ka jingshah ktah ki tyllong um na ka kam tih maw bad tih mawshun.
U ma Kyntu Shullai, Assistant Commissioner, West Jaiñtia Hills District ula ong ka jingpyntreikam ïa kane ka skhim sam um bam kala long kaba jop bad ka la pynsuk ïa ki nongshong shnong ban pynduna ïa ka por jong ki na ka jingleit tong um na ki tyllong um kiba jngai. Ula ai khublei ïa ka tnad PHE bad ïa ki nongshong shnong ka thaiñ ba kin sumar bha ïa kane ka skhim na ka bynta ka jingmyntoi ki pateng ban wan.
Shi bynta na ka prokram ‘Stop Diarrhea Campaign’ ka Lydameka Hing kala batai ba ka jingpang prie pynhiar ka lah ban don ka jingïadei bad ka um kaba jakhlia bad ka jingbym lehkhuid bad ban ïada na kane ka jingshitom dei ban pyndonkam da ka um dih kaba khuid, ka jingsait bha ïa ki kti, ka jingpynkhuid ïa ki tyllong um dih bad ban phah test ïa ka um dih ban pynthikna ïa ka jingshngaiñ jong ka.
La pynsngew ba ka jingthmu jong ka Jal Jeevan Mission, ka long ban pynbiang ïa ka um dih sha manla ki longïing ha ki thaiñ nongkyndong bad ki jaka treikam kum ki skul, ki jaka ai jingsumar bad ki Anganwadi Centre.
Ka kong Daiamonlang Ksoo, SDO ka PHE kala pynsngew katkum ki kyndon ka JJM dei ban pynbiang ïa ka um kaba ym duna 55 liter ha ka shisngi. Ka kyntu ïa ki nongshong shnong ban ïatreilang bad ka VWSC, na ka bynta ka jingbha jingmiat ha ka rukom pynpoi ïa ka um bam shapoh ka shnong ka thaw.
Ha kane ka sngi la sam ruh ïa ka khusnam da ka syrnot sha ka Sohkha Mission kum ka jingithuh ïa ka jingïashim bynta shitrhem jong ka haka Jal Arpan Diwas bad ka jingshimkhia jong ka haka jingpynneh pynsah ïa ka um bam bad ka jingïada ïa ki tyllong um.
Ha kane ka prokram la ïoh ruh ïa ki jingrwai, ka jingpynskhem ïa ka Har Ghar Jal, ka jingsam ïa ki syrnot Jal Arpan Diwas, katba ïaki kyntien ai khublei la ïoh na u ma Marshall Manner.