– Sdang ka jingsiat Tear Gas ki Pulit mynta ka sngi shah ktah ki longkmie bad ki khynnah –
Katkum ka tyllong khubor bala ïohlum na ki seng bhalang la ïathuh ba ki nongïalam ba hakhmat jong ka Jaiñtia National Council (JNC) kiba thmu ban leit sha jaka ban pynlong Public Hearing jong ka Company Shree Cement ha Lum Syrman East Jaiñtia Hills District ka ban sa long lashai ka sngi 31 tarik u Naitung kila shah khang lynti bad shah kem ha ki Pulit mynta ka miet.
Katkum ka kyrwoh khubor ki tei ki nongïalam ka Jaiñtia National Council (JNC) kiba shah rah bor ki kynthup ïa u President Rangbah ka seng u Sambormi Lyngdoh, General Secretary ma Wanshwa Suting bad u Publicity Secretary ma Allmiki Ryngkhlem.
Shuh shuh ka tyllong khubor kala ïathuh ka jingthmu jong ki nongïalam seng bhalang ban leit khnang sha katei ka jaka naduh mynta ka sngi ka long kum ka lad ban poi suk sha katei ka jaka ba pynlong Public Hearing namar lashai ka sngi ka lah ban don ka jingkhang lynti ïa kiba thmu ban leit Public Hearing.
Mynta la sngi na ka liang ki bor pynïaid ïa ka Public Hearing bad ki bor sorkar ruh kila leit mynta hi ka sngi sha katei ka jaka.
Hynrei mynta ka janmiet kala don ka jingpynibor na ka liang ki Pulit ban khang lad ïa ki dkhot sengbhalang ban leit sha katei ka jaka ha kaba ki Pulit kila pyndonkam ne siat da ki Tear Gas ha iew Umplemg, ha kaba la don ruh ki longkmie bad ki khynnah kiba la shitom na kane ka jingsiat tear gas ki Pulit.
[Ki longkmie bad khynnah kiba la shah ktah na ka jing siat tear gas ki Pulit, ia kine la wan ban iarap da ki riew paidbah kiba la sakhi ia kane ka jingjia]