Wat hapdeng ka jingpyrshah na ki katto katne ki paidbah bad ki sengbhalang, ka Public Hearing halor ka projek jong ka Shree Cement ha Lumsyrman Limestone Mining Block A ka la long kaba ïaid beit ïaid ryntih mynta ka sngi da ka Meghalaya State Pollution Control Board (MSPCB).
Ka jingïalang paidbah la pynïaid da u Additional Deputy Commissioner ka East Jaiñtia Hills District, u A Nongbri, ha ryngkat ka jingïadonlang u Environmental Engineer jong ka MSPCB, u Y F Laloo. Ki nongshong shnong na Daistong ruh ki la wan ban shim bynta ha kane ka Public Hearing.
U Dolloi ka Elaka Nongkhlieh u la pynpaw ïa ka jingkyrshan ïa ka Shree Cement bad ong ba watla ki bor synshar ki la mad bun ki jingeh ban pynlong ïa kane ka Public Hearing, hynrei ka la long kaba ïaid beit ïaid ryntih.
U Waheh Shnong ka Tongseng Nongkhlieh ruh u la pynpaw ïa ka jingkyrshan ïa kane ka projek, da kaba ong ba ka jingwan ka Shree Cement kan plie lad ban thaw bun ki kam jingïarap kamai jakpoh ïa ki samla shnong. Ki paidbah kiba kyrshan ruh ki la ong ba kane ka company kan wanrah jingmyntoi ïa la ki khun ki kti. Ki riewkyrshan shnong ruh ki la ai jingkren katkum la ka jong ka jingmut ha kane ka Public Hearing.
Ha ka jingkren ba khatduh, u Additional Deputy Commissioner u A. Nongbri u la ai jingïaroh ïa ka bor synshar distrik bad ong ba u sngewkmen ba ka Public Hearing ka la long kaba ïaid beit ïaid ryntih.
