Ki sengbhalang kiba kynthup ïa ka JNC, JSU, KSU, HNYF bad kiwei pat, mynta ka step jong ka 31 tarik Naitung ha ka por kumba 6 baje mynstep, ki la pyrshang ban leit shim bynta ha ka Public Hearing jong ka Shree Cement Ltd ha Lum Syrman, Elaka Nongkhlieh, East Jaiñtia Hills District. Hynrei, ki la shah khang lynti da ki nongkyrshan jong ka Shree Cement bad kim shym la lah ban poi sha katei ka Public Hearing, namar ba ïa ka surok ruh la khlong da ki paidbah.
Ha kaba ïadei bad kane, ka JNC, JSU bad ka Hima Sutnga Youth Federation (HSYF) ki la pynrem jur ïa ka jinglong jong ki pulit bad ki nongkyrshan jong ka Shree Cement kiba la khanglad ïa ki ban leit shim bynta ha ka Public Hearing.
U Secretary jong ka HSYF u la kynnoh ba ka kynhun kaba ïadei bad ka Shree Cement ka la khlong ïa ka surok, ki la ïeng nalor ki lum bad ki la kawang maw ïa ki. U la kynnoh ruh ba ki pulit ki la leh ïa kine kiei kiei da ka jingbit na ka Sorkar.
U Education Secretary jong ka JSU u la ong ba ki pulit ki shu peitkai katba ki nongkyrshan jong ka Shree Cement ki dang kawang maw ïa ki, kaba la pynbor ïa ki ban phai noh bad pynlong da ka jingïalang kaba rit hajan ka Coke Factory ha Umpleng Market. U la buh jingkylli ruh kumno yn lah ban pynlong ïa ka Public Hearing haba ym shah ïa kiba pyrshah ban leit shim bynta.
U Vice President jong ka JNC u la kyntu ïa ka Sorkar ba kan pyllait noh ïa ki nongïalam jong ki kiba la shah bat, lym kumta kin sdang da ka jingïakhih kaba heh ha Jaiñtia Hills. U la kyntu ruh ïa ka bor synshar district ba kan kem ïa kiba donkti ha ka jingkawang maw bad ha ka jingkhang lynti. U la ong ruh ba wat la kim shym la poi sha ka Public Hearing mynta ka sngi, hynrei kin dang bteng ïa ka jingïakhih jong ki.
