Ka lympung ïalehkai phutbol jong ka (L) Joybell Suiam Memorial Football League 2026 ha ka kyrdan 2nd Division, kaba la pynïaid da ka Thadlaskeiñ Sport Association (TSA), kaba la long mynta ka sngi 1 tarik u Nailur, 2026 ha madan Wahiajer Multi Sports Complex Stadium, ha kaba la don lai tylli ki jingiakhun mynta ka sngi.
Haba phai sha ka jingïakhun kaba nyngkong kaba long hapdeng ka Umladang SC pyrshah ia ka Nongdhar SC, ha kaba ka Umladang SC ka la lah ban pynliem iaka Nongdhar SC da 3-0 kol. Ia ki kol na ka Umladang SC la ioh ban thep nyngkong da u Ribha Muruh ha ka minit kaba 11, kaba ar da u Pynkhrawbor Langshiang ha ka minit kaba 24 bad kaba lai da u Rimius Nongtdeh ha ka minit kaba 34 jong ka jingiakhun.
Haka jingïakhun kaba ar pat ka Shillong Police Ft ka la pynliem ia ka Mukhla Nongrim haduh 5-0 kol, ia kine ki san kol la jong ka Shillong Police Ft la ioh ban thep haduh lai kol tang da u Iohbor Nonglyer kawei ha ka minit ba sdang jong ka jingiakhun, kaba ar ha ka minit kaba 26 bad kaba lai ha ka minit kaba 66, katba sa ia ki ar tylli ki kol pat la ioh ban thep da u Iohboklang Kshiar ha ka minit kaba 45 bad 49 jong ka jingiakhun, katba na ka liang ka Mukhla Nongrim kam shym la lah satia ban pynphai wat tang shikol ruh.
Katba haka jingïakhun kaba lai pat ka la long hapdeng ka Lumkhudung SC pyrshah ia ka Niriang SC ha kaba ka Lumkhudung ka la lah ban pynliem ia ka Niriang da 2-1. Ia baroh ar tylli ki kol ka Lumkhudung SC la ioh ban thep da u Lamjuh Muruh ha ka minit kaba 38 bad 48, katba ia ka shi kol ka Niriang SC la thep da u Sylvester Lamurong ha ka minit kaba 27.
Katba ki jingïakhun na ka bynta ka 02.09.2026, kan long haka por 10 baje mynstep ka Ryntih mynsngad Sc pyrshah ia ka Tympang Iongshiwiat SC, haka por 12 baje mynsngi kan long hapdeng ka Hunlang FC Rakabah pyrshah ia ka Lumkynter SC bad haka por 2 baje nohphai sngi pat kan long hapdeng ka Iawpynsin SC Wahiajer pyrshah ia ka Mynkrem SC.