Ka ophis jong ka Krishi Vigyan Kendra (KVK), Jaintia Hills ka la pynlong ïa ka jingai jinghikai ba shisngi halor ka phang ‘Capacity Building and Skill Development Program on Post-Harvest Management of Buckwheat’ mynta ka sngi (1.09.2026) ha Training Hall jong ka, kaba don ha Moopun, Wahiajer.
Ha kane ka prokram la wan ban ïashim bynta da ki 116 ngut ki nongrep bad kiwei de kiba ïadon bynta.
Ia ka prokram la pynïaid ka ka B.Kharbamon, kaba dei ka Subject Matter Specialist (Horticulture), KVK Jaintia Hills kaba la pdiang burom ïa baroh kiba wan ïashim bynta.
Ha kane ka prokram la ïoh ïa ki jinghikai bapher bapher lyngba ki riew shemphang (Resource Person) kiba la pyntbit ïalade ha kine ki phang.
Ha kaba nyngkong la ïoh ïa ka jinghikai kaba la khot ‘Pakage of Parctices and Post-Harvest Management of Buckwheat’ ïa kaba la ai jinghikai da Dr. A. Dympep, Subject Matter Specialist (Agricultural Extension), KVK Jaintia Hills. La hikai halor kumno ban thung ïa une u jait jingthung ba la khot ha ka ktien Khasi u ‘Jarain’, nangta kumno ban buh bha ban pynneh pynsah ïa u symbai.
Ka jingai jinghikai kaba ar ka long halor ka ‘Post-Harvest Management Practices’ kaba la ai jingbatai da ka kong Eleonora Shylla, Directorate of Food Processing, kaba la hikai kumno kheit ïa u soh na une u jingthung (Jarain) ban lum ban lang, ban pynkhuid bad buh bha, khnang ba yn lah ban pynïaid ïew.
Ka jinghikai kaba lai ka long halor ka PRIME Meghalay, ïa kaba la ai jinghikai da ka Lakynti Marbaniang, na ka PRIME Meghalaya kaba la batai shaphang kane ka bynta. Ka kong Marbaniang kala ïathuh lyngkot ia ki lad jingïarap ba ki nongrep ne ki nongsengkam lajong ki lah ban ïoh lyngba ka CM-Elevate, na ka Business Ventures, ka Academia and Partnerships bad kiwei de ki lad jingïarap. Kala kyntu ruh ïa ki nongwan ïashim bynta ba ki lah ban ïoh ïa ki skhim sorkar da kaba aplai lyngba ka Meghalaya One Portal.
Ka jingai jinghikai kaba saw ka long halor ka ‘Value Addition, Branding, Labelling and Food Pakaging’, ïa kaba la ai da u bah Vicky Lanong, na ka PRIME Meghalaya. La hikai kumno ban test ïa ki mar ban ïoh ïa ki mar kiba don ka jingtei ïa ka met u briew, ka rukom pynbiang ïa ki kot ki sla kiba donkam khnang ban ïoh ïa ka registration na ka FSSAI.
Kawei pat ka jinghikai kaba san ka long halor ka ‘Benefits and Opportunities in Buckwheat Cultivation’ ïa kaba la hikai da u bah Paia Mylliempdah uba dei u nongrep bad President ka Shalyntem ki Nongrep Society, Lyngiong, East Khasi Hills, uba la batai bniah ïa ka rukom rep ïa une u jingthung bad ka jingmyntoi ba ïoh na une u jingthung. U la kyntu ïa ki para nongrep ban shim ïa ka rukom rep kaba pyntyllun ïa ki jait jingthung bapher bad ruh ban pyndonkam tang da ki sboh mariang, khnang ban pynneh pynsah ïa ka jingbha jong ka khyndew.
Kham hashwa jong ka jingïalang la ïoh ïa ka jingkren pdiang na i Dr. A. Dympep, Subject Matter Specialist (Agricultural Extension), KVK Jaintia Hills. Ia ki kyntien ai khublei la ai da u bah M. Kharbuli, Farm Manager, KVK Jaintia Hills.
