Ka Pnar Student Movement (PSM), Central Body, hapoh ka jingïalam u President Rangbah ka Seng, u E. Passah, bad u General Secretary, u W. Wann, ryngkat bad ki katto katne ki dkhot ka Seng, lem bad ka President ka PSM Women’s Wing, ka Banikas Laban, ha kane ka sngi ki la leit ban ai mynsiem bad ai jingiarap ïa kawei ka longïing kaba mad ïa ki jingeh kiba khraw ha ka shnong Mowluber, Laskein Block, West Jaintia Hills District.
Ka Seng ka la pynpaw ba kane ka longïing ka shong tang ha kawei ka ïing kaba la tap da ki phlang bad ka bym shngaiñ ban shong ban sah. Kane ka longïing ka don kumba san ngut ki khun bad kawei na ki khun jong ka la don ha ka jingduna ha ka met, kaba la pynlong ïa ka ban mad ïa ki jingeh naduh ba ka dang khynnah.
Ha ka jingïakynduh bad kane ka longïing, ka Seng ka la ioh ban sngap bad tip shaphang kiba bun ki jingeh kiba kane ka longïing ka la mad. Na ka liang ka Seng, ka la buh ïa ka jingkyrpad sha ki bor sorkar, khamtam sha ka ophis u Block Development Officer (BDO), Laskeiñ Block,ba kin sngewbha ban peit bniah ïa kane ka longïing bad ban pynurlong ïa ka jingiarap ba donkam.
Na ka liang ka PSM, ka la ai jingiarap da ki tin sop ïing ïa kane ka longïing. Ka Seng ka la pynpaw ruh ba kan dang wad ïa ki lad ki lynti kiba lah ban ïarap ban tei ïa ka ïing kaba kham biang bad kaba shngaiñ na ka bynta kane ka longïing.
Ka Seng ka la kyntu ruh ïa ki bor sorkar bad ki tnat kiba dei peit ba kin sngewbha ban shimkhia ïa kane ka bynta bad ban ai ka jingïarap kaba donkam ïa kane ka longïing kaba mad ïa ka jingeh kham kloi katba lah.
Kane ka long katkum ka kyrwoh ba la pyllait da u Publicity Secretary ka PSM, u Khynrow S. Lakiang
