Ka tnad Transport jong ka Sorkar Jylla bad ka tnad Transport jong ka Sorkar Assam ha ka 8 tarik Nailur ki lah iakynduh ban iakren haba iadei bad ka jingeh ki nongniah tourist hapdeng baroh ar tylli ki Jylla hapdeng ka Assam bad Meghalaya.
Ha kane ka sngi ba pynlong ia ka jingialang la ia don lang ruh u Symbud Myntri Rangbah ka Jylla u Ma Sniawbhalang Dhar, u Myntri ka sorkar Assam u Atul Bora bad ia ka jingialang la pyniaid da u Commissioner & Secretary ka tnad Transport ka Sorkar jylla u Sanjay Goyal ha ryngkat ka jingdon lang ki heh ophisar ki heh Pulit ka Jylla Meghalaya bad kumjuh ki ophisar na ka Sorkar Assam bad ki tourist Association na ka Jylla Assam bad Meghalaya.
Haba kren sha ki lad pathai khubor u Symbud Myntri Rangbah ka Jylla u Ma Sniawbhalang Dhar u la ong ka jingialang mynta ka sngi ka long kaba sngewtynnad ha kaba na ka Liang baroh ar kynhun ki Tourist Association, ki la pynsngew ia la ki jong ki jingeh ha kane ka jingialang.
Na ka Liang U Ma Sniawbhalang Dhar u la pyntip ruh ba ki Tourist Association napoh ka Jylla ki pan jaka ieng ha Airport bad ka Sorkar Assam ka la kular ban shimkhia ia kane ka jingpan ieng kali ki tourist ha Airport.
Halor ka jingshah talasi ki kali tourist ha ki Pulit u Ma Sniawbhalang Dhar u la ong ba ka tnad Pulit jong ka Sorkar Assam bad Meghalaya kin ia treilang khnang ba kin nym iakynduh jingeh shuh hadien habud lada ki leit sha Assam, lane ki wan sha Jylla Meghalaya.
Lada wan kano kano ka jingeh ka Sorkar jylla bad Sorkar Assam lyngba ki Commissioner & Secretary jong baroh ar tylli ki jylla kin sa pynlong ia ka jingiakynduh lada donkam ha kano kano ka por, ong u Ma Sniawbhalang Dhar.
U la pyntip ka Sorkar jylla bad ka Sorkar Assam ki pynpaw ia ka jingkmen ban iohsngew ia ki jingeh ba ki Tourist Association jong ka jylla Assam bad Meghalaya ki la pynsngew bad nangne shakhmat khnang ba kan nym don shuh ka jingeh ha ka leit ka wan hadien habud.
