Ka K.B. Memorial Higher Secondary School, Wapungskur, ha East Jaiñtia Hills District, ka la rakhe ïa ka sngi burom ki Nonghikai, mynta ka sngi ba-ar, ha phyllaw jong ka skul hi. Ha kane ka jingïalang la wan iashim bynta da ki khynnah skul jong ka Higher Secondary, ki kmie ki kpa, ki nonghikai ha ka jingdonlang u Principal jong ka skul.
La pynbyrngia ïa ka prokram da ki khynnah skul naduh class Nursery haduh class 10, ha kaba ïa ka prokram la pynïaid da ki khynnah Class 10. Shuwa ban sdang ka prokram, u Principal jong ka skul u Dr. Heipor Uni Bang, u la ot ïa u cake ryngkat bad ki nonghikai. Ki khynnah ki la pyni ïa ki jingshad bapher bapher, ki fashion show, jingkren bad kiwei kiwei de.
U Dr. Heipor Uni Bang, u dei uba la ïoh pdiang ïa ka National Teachers’ Award 2025 na ka President jong ka ri, ka Droupadi Murmu, ha New Delhi. Ha ba ai jingkren ha ka jingïalang, u la ong ba ka 5 tarik u Nailur ka dei ka sngi ki Nonghikai kaba la rakhe kylleng ka ri India, ban kynmaw burom ïa ka sngi kha jong u Dr. Sarvepalli Radhakrishnan, uba dei u riew pule, riewstad bad nongïalam ba pawnam.
U la ong ba u Dr. Radhakrishnan u la noh synñiang shibun sha ka liang jong ka pule puthi bad sha ka kam hikai ha ka ri. U Dr. Bang u la kyntu ïa ki kmie ki kpa bad ki khynnah ban rakhe ïa kane ka sngi da ka jingkmen bad ban kynmaw ïa ka jingmut bad ka jingkordor jong kane ka sngi. U la ong ba ki nonghikai ki long kum ki kmie ki kpa ba-ar, kiba thaw dur bad ïalam lynti ïa ki khynnah pule ha ki skul. Katkum ka jingsngew jong u, uwei pa uwei u nonghikai um hikai tang ïa ki jingtip kiba don ha ki kot, hynrei u hikai ruh ïa ki jinghikai akor bad jinglong briew kiba donkam ha ka jingim.
U la ong ruh ba ki khynnah Class 10 kiba ïakhun ïa ka eksamin SSLC mynta u snem ki dei ka batch kaba 12 jong ka skul, bad u kyrmen skhem ba kin leh bha ha ka eksamin. U la kyntu ïa ki ban shim mynsiem na ki khynnah kiba la dep pule kiba la lah ban ïoh 100 percent ha ka eksamin SSLC bad ban bud ïa ki dienjat jong ki. Ha kaba kut, u la ai khublei ïa baroh ki khynnah Class 9, 10 bad 11 kiba la trei shitom ban pynlong ïa kane ka prokram kaba seisoh.
