Ka World Literacy Day, ka dei ka sngi kyrpang haka jingiadei bad ka thoh ka pule, kaba la sdang da ka UNESCO naduh u snem 1966. Ha une u snem ka UNESCO, ka la buh kyrpang ia ka phang pdeng ka jong ka World Literacy Day kaba ong “Literacy for People, the Planet and Prosperity”, ka jingnang jingstad ia baroh lang salonsar khlem da don kano kano ka jingsngew iapher bad ban ialeit ryngkat katkum ba long ka juk mynta, kynthup ia ka rukum im ha ka imlang sahlang, ban tip ha ka ban kheiñ kor ia ka Mei Mariang bad ki sawdong sawkun jong ka, kumjuh ruh ban kyntiew ia ka roi ka par lyngba ki lad kamai kajih bapher bapher katkum ka juk mynta.
Ha West Jaiñtia Hills District mynta ka sngi, lyngba ka ophis treikam jong ka District Mission Coordinator, Samagra Shiksha, ki skul kiba don ha ki Block bapher bapher jong ka District, ki la shim khia ban pynlong ia ka programme kaba kyrpang na ka bynta ki khynnah skul da kaba pynlong ia ka Drawing-Painting, Recitation, Slogan Writing, Poitri Writing bad kiwei de kiba long shi bynta ka dak ka jingiasnohkti lang bad ban pyni ruh ha khmat ka pyrthei ia ka jingkordor jong kane ka sngi.
Shuh shuh na ka liang ki nonghikai, khnang ban khring ia ki jingmut jingpyrkhat jong ki khynnah haka jingiadei bad ka jingkordor jong ka jingtip ban thoh bad ban pule ha kane ka juk kaba mynta, ki la shim bynta ban ai ki jingkren ba kyrpang halor ka thong jong ka World Literacy Day bad ban pynlong ruh ia ka Literacy Pledge Reading.
