Ka Advocacy Reform Movement (ARM), mynta ka sngi jong ka 9 tarik Nailur, ka la aiti ïa ka dorkhas sha u myntri ka tnat koit ka khiah ka jylla Meghalaya, u ma Wailadmiki Shylla, ban pynkynmaw bad buddien halor ka jingpyntrei ïa ka Government Nursing College hapoh Jaiñtia Hills District.
Hadien ka jingïakren bad u Myntri, na ka liang jong u, u la pyntip ba halor ka jingpyntrei ïa ka Government Nursing College, ki bor sorkar ki la dep leit peit ïa ka jaka ha shnong Mukhla, kaba long ka jaka kaba biang bha na bynta ban tei ïa ka kolej, kynthup ruh ïa ka jinglong jingman jong ka sawdong sawkun.
U la pyntip ruh ba ka jingbuh ïa u mawnongrim ka la slem namar ka jingïadei bad ka agreement kaba hap ban pynbeit hapdeng ka shnong, khamtam ha kaba ïadei bad ka reservation bad ki pud ki sam jong ka shnong.
U Myntri u la ong ruh ba ym don jingeh shuh ha kaba ïadei bad ka sanction ïa kane ka Nursing College, hadien ba la dep pynbeit ïa ka agreement bad ka shnong. U la ong ba un pyrshang ban pynsted ïa kane ka kam bad lada lah, hapoh mynta hi u snem yn sdang ïa ka jingtrei.
Na ka liang u President ka seng u samla Burom Dkhar, u la ong ba kane ka jingïakynduh bad u myntri ka koit ka khiah ka la ai mynsiem ïa ka seng, khamtam ïa ki samla kiba pule Nursing ha baroh kawei ka District.