Ki nongri sniang ha ryngkat ka Hills Farmer Union (HFU) mynta ka sngi ka 10 tarik Nailur 2026 ki la pynlong ia ka jingiaid paidbah na Civil Hospital sha Madan Malki kum ka dak ban dawa na ka Sorkar pynurlong noh ia ki mat jingdawa jong ki nongrep hapoh ka Jylla.
Ha kane ka sngi ba iaid paidbah la ia snohkti lang da ki nongrep bad kumjuh ki nongialam ka Hills Farmer Union Central Body.
Ki nongialam ka Hills Farmer Union kiba la ai jingkren ki kynthup ia u President Bah Commander Shangpliang bad kumjuh u General Secretary u Bah Alphons Kharsyntiew bad kiwei kiwei.
Ha kane ka sngi ki nongialam ka Hills Farmer Union ki la pynsngew ia ki jingeh kiba ki nongri sniang hapoh ka Jylla ki iakynduh jingeh .
Ki mat jingdawa ba ka Hills Farmer Union ki dawa na ka Sorkar ki kynthup ia ka jingpynieng ia ki check Points / Testing Centre ha ki inter State Border Khamtam ha Jorabat lane Byrnihat.
Ka jingdawa ban map noh ia ka ram (Loan) jong ki nongri sniang lyngba ka ram Piggery Mission ba ki shim ram ban ri sniang.
Ban siew ia ka jinglut jingsep ia baroh ki nongri sniang kiba lah shah ktah ha ka khlam African Swine Fever (ASF).
Ka jingdawa ban pynmih da ka jingpynbna ban khang pyrshah ia ka jinglum Pisa be-aiñ ha ki surok bah khlem ka jingtip jong ki Veterinary bad ban jubab ia ki jingkylli jong u nongrep bad nongri jingri halor ka Direct Entry.
Ban dawa ia ka Agriculture Policy kaba u nongrep u la dawa lah slem bad ka jingsngewkhia halor ka jinghiar dor palat ki nongrep.
Na ka Liang ka Hills Farmer Union ka la pyntip lada ka Sorkar ka sngap mynthi ia kane ka jingdawa ki nongrep kan sa poi ka por ba kin sa wanrah syndon da u Sniang sha Secretariat bad kumta ki kyntu ia ka Sorkar ba kan pyntreikam noh ia ki mat jingdawa ki nongri sniang ka Jylla.
