U Myntri Rangbah ka Jylla Conrad K Sangma ha ka sngi Palei, ula plie paidbah ia ka Block Integrated Development Complex ka Rongara C&RD Block ha South Garo Hills District.
U MLA ka Siju-Rongara Rakkam A. Sangma ula iadonlang ha kane ka jingialang.
Haba ai jingkren, u Myntri Rangbah ula ai ka jingiaroh ia u MLA namar ka jingtrei shitom jong u bad ka jingaiti lut sha ki paidbah ka constituency jong u.
“Kane ka building thymmai ka block ka dei u soh ka jingtreikam ba shisha jong u MLA bad ka jingiohi jngai na ka bynta ka roi ka par jong ka thain” ula ong.
U la kyntu ia ki nongtrei jong ka Block ba kin shakri ia u paidbah da ka jingleh hok bad jingaiti lut.
“Ha ki jaka kyndong, ki paidbah ki ju leit sha ki Ophis ka Block da ka jingkyrmen ba kan weng ia ka jingeh jong ki. Ki nongtrei ki dei ban shah skhor ia ki, sngewthuh ia ki jingeh jong ki bad ban wad ia ki lynti ban weng iaki” ula ong.
U Myntri Rangbah ula ong ruh ba ka Sorkar kala kyntiew kyrdan mynta ia ki jingtei ha kylleng ka Jylla ha kine ki lai snem bala leit noh.
U ong baroh ki 56 tylli ki C&RD Block ha Meghalaya ki dei kiba la dep maramot pura lane la ioh da ka building ba thymmai. Ka jingthmu ka long ban pynjanai ia ka jingai jingshakri ia u paidbah bad ai ia ka jaka treikam kaba kham biang ia ki nongtrei.
U Conrad ula ban biang ia ka jingkut jingmut jong ka Sorkar ban wanrah shajan ia ka synshar khadar sha u paidbah bad ban pyntyllun sted ia ka roi ka par, khamtam ha ki jaka kyndong bad jaka khappud.
