Mynta ka sngi, 11 tarik Nailur 2026, ka Khasi Students’ Union, East Jaintia Hills District (KSU EJHD), hapoh ka jingïalam jong u General Secretary, u Kwilness Suchiang, ryngkat ki dkhot jong ka seng, ki la aiti ïa ka memorandum ha u Executive Engineer, PWD Khliehriat Division.
Ka dorkhas (memorandum) ka dei halor ban pan jingshai halor ka jingtih bad jingpynjulor ïa ka surok paidbah ha Lad Tongseng ha ka 31 tarik July 2026, bad la dawa ruh lyngba ka FIR ban leh ia kaba donkam pyrshah ïa kiba donkti.
Haba kren sha ki lad pathai khubor ha Khliehriat, mynta ka sngi, u General Secretary ka KSU EJHD, u Kwilness Suchiang, u la ong ba ka seng ka la wan sha ka ophis PWD ban pan jingpynshai la ka don ne em ka jingbit na ka tnat PWD ban tih ne pynjulor ïa katei ka surok. U la ong ruh ba ka KSU ka thmu ban leit sha ka jingpynlong Public Hearing kaba la long ha ka 31 tarik Naitung 2026, ha kaba katei ka surok ka la shah pynjulor.
U la kyntu ba lada ka tnat ka la ai jingbit ban tih ïa katei ka surok, ka dei ban pyntip ne ai sha ka KSU ïa ka jingpynshisha da ka jingthoh halor katei ka jingbit, kynthup ïa ka file number, order number, bad ka kyrteng bad kyrdan jong u ophisar uba la ai ïa katei ka jingbit.
U la pan ruh ba lada don kano kano ka tnat sorkar, u briew shimet ne kano kano ka kynhun kaba la pan jingbit na ka PWD ban tih ïa katei ka surok, ka tnat ka dei ban ai sha ka KSU ïa ka jingtip da ka jingthoh ne ki kyrteng jong kiba la pan jingbit. Lada ym shym la ai jingbit, u la pan jingtip la ka tnat ka la pynlong ne em ïa kano kano ka jingtohkit ban lap ïa kiba la donkti ban tih ïa katei ka surok.
U Suchiang u la kyntu ïa ka PWD ban ujor FIR khnang ban lap ïa kiba donkti. U la kynnoh ba lada ka tnat ka pynslem ban shim ia ka sienjam, kane kan pyni ba “don kaei kaei kaba rieh hapoh jong ka.” U la bynrap ba ka KSU ka la dep ruh ban ujor FIR sha ka Crime Branch, bad u la pynpaw ïa ka jingshaniah ba ka aiñ kan shim ïa ka sienjam kaba donkam, da kaba kyntu ïa u paidbah ban long kiba iaishah bad ban ap.
Ha kaba kut, u la maham ba lada ym lah ban pynurlong ïa ki jingdawa jong ka KSU, ka seng kan shim ïa kiwei pat ki sienjam ha ki por ban wan.
