Ka lympung ïalehkai phutbol bala tip kum ka 6th Kyrmen Shylla Contribution Trophy League Stage 2026 jong ka kyrdan “Super Division” bala pynïaid daka East Jaiñtia Hills District Football Association (EJHDFA) kala sdang mynta ka sngi 14 tarik mynta u bnai Nailur ha madan Artificial Diengshynrum, Khliehria la wan ban aireng nyngkong daka Byndihati CSC pyrshah ïa ka Wahiajer Narpuh SSC.
Haba phai sha ka jingïakhun hapdeng ka kynhun Byndihati CSC bad ka Wahiajer Narpuh SSC kila poi sha ka jingïakhaid da mar shikol (1-1), ïaka kol na ka Byndihati CSC la thep da u Lungouhoo Hangshing haka minit ba 16. Na ka liang ka Wahiajer Narpuh SSC la thep da u Any Manar haka minit ba 28.
La pyntip ka jingïakhun lashai ka sngi 15 tarik u Nailur haka por 3 baje nohphai sngi kan long hapdeng ka Sutnga SSCC pyrshah ïa ka Chiehruphi SYWSC.