(M.M.Thaiang)
Ha ka pyrthei baroh kawei ki tip ba u longkpa u dei u Nongaisymbai, hynrei ka longbriew manbriew pat ka sdang na ka Kmie, namar ha ka; sdang ka jingim bad na ka doh na ka snam jong ka wan ka longbriew manbriew la i dei i shynrang ne i kynthei. U kpa u dei u Nongaisymbai, u Nongda u Nongker, u Nongbsa u Nongbsiab, la katta ruh ka kmie ka long kaba kongsan, naba naduh ba sdangseng ia ka longbriew, ka manbriew, la sdang hapoh ka Kopksiar Koprupa jong ka haduh ba kha sha kane ka pyrthei bad ha ka por ba danglung, dangkhian dangsbait dei ma ka kaba aibuiñ, kaba ri, ba sumar, kaba pynsum pynsait, pynshit pynsyaid, kaba pynphong that pynphong sula, kaba iahthiah, kaba iahdem, kaba aija, aikait bad dei halor kane ka nongrim bad ka jingshisha ba naduh u bakhraw tam haduh u barit tam ki demnguh burom ngon ha khmat jong ka bad haduh ban da shim jait na ka kmie. Ia kane ka jingkhraw bad burom ia ka kmie la burom da ka pyrthei hi baroh kawei bad kum ka dak ka jingburom bad ñiewkor ia ka kmie, ia ka ktien mei ktien pa, kam ju ong “FATHER’s TONGUE” hynrei ka “MOTHER’s TONGUE”. Haba shim ia ka jingmut jong ka “Mother’s Tongue” ka pawshai shynna ia ka jingkhraw, ka jingburom bad ñiewkordor ia ka kmie. Katba lah ban tip wat ha ki jaitbynriew kiba shim jait na u Kpa ruh haba ki shim ia ka ktien mei ktien pa ki ong “Mother’s tongue”.
Namar ba ym don ka jingthoh, ka jingtar ki ban pynsah kynmaw ia ki longdien ki wandien ym da tip bha kumno ka iaid ka jingsambhah sambynta jong ki kmie ki kpa iala ki khun bad kaei ka jingiapher hapdeng ki khun shynrang bad ki khun kynthei ha kita ki por kiba kham mynshwa. Haba phai sha ka juk mynta ka jingiohbhah ioh bynta ki khun na ki kmie ki kpa, ym don ka jingñiew shiliangkhmat la ki long ki khun shynrang ne ki khun kynthei. Ym lah ban len ka don ka jingnoh khyndiat khynsoit, sha ki khun kynthei, namar ba ki dei ki Nongri, Nongsumar ia ki kmie ki kpa, ka Nongri Nongsumar bad ki nongbat ia ka Kur ka Jait.
Hapdeng ki khun kynthei, ka kham iohbun ne iohtam ka khun khatduh. Ka jingioh kham bun ka khun khatduh, namar dei maka ka ban ri ban sumar ia ki kmie ki kpa katba ki dangim. Nangta haba don kano kano ka jingiakynduh shihymmen, shipara, ki pynlong ha ïing ka khatduh bad ka don ka jingkitkhlieh ia ka jinglut ka jingsep, kaba lut ha ka bam, ka sa, jong kata ka jingialang, laitnoh haba don ka jingngewlem na ki Hymmen, ki Para ban ianoh synnianglem kum ka dak ban ia donkti lang. Nangta lada jia ba khladnoh ka Hymmen, ka Para, sah khunswet ki khun jong ki, dei ka para khatduh ka ban ri ban sumar, ban lum ban lang ia ki haduh ba kin da heh, dasan bad seng la i jong i trep i skum.
Ka Khatduh lane ka khun khatduh, ka dei ka Nongri Nongsumar ia ki kmie ki kpa bad ka ioh khambun ka bhah ka bynta ka Nongmei Nongpa, wat lada ka ioh kham bun, hynrei pat kam lah ban die ia ka bhah ka bynta jong ka khlem ka jingtip jong ki Hymmen, ki Para (shynrang bad kynthei) bad haba dangim ki kmie ki kpa, ka khatduh kam lah ban leh eiei khlem ka jingtip bad ka jingmynjur jong ki, kiba long ki khliehduh jong ka ïing ka sem (Executive heads of the Family).
Ka para khatduh lane ka khun khatduh, ka nongri nongsumar ia ka kmie, ia u kpa, ia ki khunruid, ki khundain, kiba sah khunswet, kiba sahwiar sahtham bad ka ioh ia ka bhah ka bynta kaba heh jong ki kmie ki kpa, hynrei pat ka lah ban duh ia kata ka jingiohbhah iohbynta lada shem ba ka leh bakla (commit a sacrilege or taboo) bad ym tang ba ka duh ia ka bhah ka bynta jong ki kmie ki kpa, ka lah ruh ban taitkur syndon bad shah beh shnong shabar u Ryngkaw, u Basa lane shabar u pud u sam jong ka Elaka.
Hapoh ka thaiñ (Elaka u Dolloi Labang-Nongphyllut) wat lada ki khun kynthei ki iohbhah iohbynta kham bun, ha ki katto katne ki longïing ki longsem ki khun shynrang ruh ki ioh bad shong satang ha ki (khun shynrang) ban shim lane ban ym shim. Kum juh ha ka liang ka pule ka puthi, na ka liang ki kmie ki kpa, ym don ka jingñiew shiliangkhmat, ki phah skul ia ki khun shynrang bad ia ki khun kynthei bad lada ki khun kynthei, ki kiew shakhmat ha ki jingpule, ki khun shynrang ruh ki dei ban kiew shakhmat. Ka long kaba bakla ia ki katto katne ban ong ba ki kmie ki kpa ki kham ieid ia ki khun kynthei. Ha khmat ki kmie, ki kpa, la ki khun shynrang ne ki khun kynthei, ki dei hi ki khun jong ki, kiba mih na ka doh na ka snam jong ki bad ban ong ba ki kham noh sha ki khun kynthei, ka long lehse kaba bakla ha ka pyrthei ka juk mynta.