Ka Mihmyntdu Community Social Welfare Association (MCSWA) ryngkat ka jingiatreilang bad ka Directorate of Social Welfare, Govt of Meghalaya ha ka 10 tarik mynta u bnai kila plie pyrda ia ka prokram ai jinghikai halor ki rukom bapher bapher kaba hap hapoh ka Project jong ka Empowerment Programme for a high Risk Group, ha ophis jong ka MCSWA kaba don ha Salaroh, Jowai.
Ka thong jong kane ka projek ka long ban pynduna ia ka jingdon jong ki HIV bad STI hapdeng ki kynthei kiba hapden ka jingma na kitei ki jait jingpang, ha kaba la pynlong kum kine ki prokram ban aikam ai jam ia ki, khnang ba kin lait ruh na ki kam awria.
Ka Chief Judicial Magistrate WJH District kong R.M. Kharsyntiew haba ai jingkren ha kane ka prokram kala ai mynsiem ia baroh ki nongioh bynta na kane ka skhim ba kin shim khia ia kane ka jingai jinghikai ia ki khnang ba kan long ka jingmyntoi ia ki hadien ba kila pyndep ia ka. Kala iaroh ruh ia ki nongiaid MCSWA kiba la lah ban pynlong ia kum kine ki prokram kiba lah ban ai jingmyntoi ia kiba shah hikai bad kin ioh ia ka lad kamai kajih ban pyndap ia ka ïing ka sem jong ki.
Ki jait jinghikai kiba la ai ha kane ka prokram ki kynthup ia ka jingri sniang kaba la jied haduh 25 ngut ban ioh ia kane ka jinghikai, ka Beauty Therapis la jied 30 ngut, ka Food Processing la jied 15 bad ka Fast Food Vendor la jied 15 ngut. Kiwei de kiba iadon lang ha kane ka prokram ki kynthup ia u Dr. D.I. Kjam, District Veterinery Officer, ma Lambor Suchen SDO MSSDS, ma R Shadap DMM, MSRLS , i DR JN Shullai Director MCSWA bad kiwei. Ia ka jingialang la pyniaid da ka Sunita Suna PM MCSWA bad ia ka kyntien khublei la ai da A J Nongkynrih, Chief Functionary MCSWA.
