(M.M.Thaiang)
U ma Mihsalan Suchiang, Ex-MLA, MDC, ka Mowkaiaw Assembly Constituency, West Jaintia Hills District, u dei uwei na ki ‘riewkhmat ka Elaka, u Dolloi Raliang bad u Nongmihkhmat (MDC) sha ka Jaintia Hills Autonomous District Council bad sha ka Meghalaya State Legislative Assembly, na ka Mowkaiaw Assembly Constituency. La kha ia u ha ka 24 tarik Jylliew (June) 1942, ha shnong Mowkaiaw, Elaka Raliang, Jaintia Hills. U dei u khun Phrangsngi bad dei tang ma u, u shynrang na ki hynriew ngut ki khun jong ka Phidaros Suchiang bad u Obiwel Kamar, kiba la leit bam kwai ha iing U Blei.
Ki kmie ki kpa, ki la phah skul ia u naduh dangrit bad u la pyndep ia ka jingpule Lower Primary School ha shnong lajong (Mowkaiaw), ban bteng shuh shuh ia ka jingpule, la phah skul ia u ha Shangpung Mission Middle English School, hadien ba u la pass ia ka Middle English School, la phah skul ia u ha Government Higher Secondary School, Jowai. Hadien ba u la pass ia ka Secondary School (Matrik ha kata ka por) ban bteng shuh shuh ia ka jingpule sha ka kyrdan kaba kham shaneng, la phah skul ia u ha St. Edmund College Shillong bad u la pyndep ia ka jingpule Pre-University (P.U) bad Bachelor of Art (BA) na St. Edmund College Shillong bad ia ka Master Degree (MA English) na Guwahati University bad u la long uba nyngkong eh ban ioh ia ka kyrdan Master Degree na Mowkaiaw bad na ka Elaka Raliang baroh kawei ha kata ka por.
U ma Mihsalan Suchiang, u long u briew uba ieid bad niewkor ia ka jingnang jingstad, uba kwah, uba thrang ba ki khun jong ki nongshong shnong ka Mowkaiaw, kin long kiba nangkot nangsla, nangthoh, nangpule puthi. Hadien ba la pass ia ka jingpule Master Degree (MA), u la shimti kum u Head Master, ka Mowkaiaw M.E. School, ha ka snem 1972, ka School kaba la seng da u Kpa jong u, u ma (L) Obiwel Kamar.
Katba nangiaid ka por, ki nongshong shnong jong ki “LAI MAW”, kata Mowkaiaw, Mokhap (Mukhap) bad Mowtyrshiah, kiba la iohi miet step ia ka jinglong ba jai jai, ba jemnud, uba bha mynsiem bad uba la heh kyrdan pule, kim kwah ba u ma Mihsalan un shu kut tang ha ka kam hikai skul bad ki kwah ruh ba un ia shim bynta ha ka kam Hima Sima. Hadien ka jingai jingmut kiba bun kiba lang u la sngewdei ban ia ioh bhah ioh bynta ha ka kam sain hima sima bad u la pyniasoh ialade bad ka Party “All Party Hill Leaders Conference” (APHLC) ha ka snem 1973.
Ha ka snem 1974, u la iakhun ia ka Elekshon MDC sha ka iingdorbar ka Jaintia Hills Autonomous District Council (JHADC) na ka Mowkaiaw District Council Constituency bad u la jop. Kum u MDC, u la jop 5 Term lynter na kane ka Constituency, nangta u la iakhun ia ka MLA ban mihkhmat sha ka iingdor ka Meghalaya Legislative Assembly bad u la jop 3 term lynter na ka Mowkaiaw Assembly Constituency. Ha ki 3 term ba u la jop kum u MLA, u la long ruh u Myntri ka Sorkar Meghalaya uba dei peit ia ka Tnat Pule Puthi (Education Department), ia ka tnat ka rep ka riang (Agriculture Department) bad ia ka tnat Law Department.
U ma Mihsalan Suchiang, wat lada u long u briew uba heh ka kyrdan pule puthi, u Nonghikai bad u Nongmihkhmat paidbah (MLA, MDC), hynrei pat u long u briew uba ieid ia ka rep ka riang bad ia kane lah ban sakhi da une u Nongthoh uba leit donkam ia u. Shisien une u Nongthoh u la mih na la shnong ban leit donkam ia u (ma Mihsalan), haba une u nongthoh u la poi ha iing jong u, u la kylli na kiba ha iing bad la ong ba u la leit sha Hali kba ban leit thiew kynbat ne tip u leit donkam aiu. Une u nongthoh namar ka kam ba kyrkieh, la hap leit sha Hali (pynthor kba) bad ha pynthor kba (Hali) utai u ma Mihsalan u dang dem ngun ban thiew kynbat. Hadien ba la dep ka jingiakren kam, shwa ba ngan leitphai shala shnong, u ong “Nga ieid ia ka kam rep, nga kyntu ruh ia ki briew ban ieid ia ka kam rep kam riang, ka kam thung kam tep bad ka kam ri jingri”. Haba ia kren bad une u nongthoh kum u paralok, u ong “wat lada nga don ka kyrdan pule puthi, u nonghikai bad u nongmihkhmat paidbah (MLA,MDC) hynrei pat nga ieid ia ka kam rep kam riang bad nga sngew ba nga long kum u Agriculturist by profession”
U ma Mihsalan Suchiang, um shym la long tang kum u nonghikai, uba ai jingnang jingstad ia ki briew, u nongmihkhmat paidbah uba peit ia ka bha ka miat, ka roi ka par jong ki nongshong shnong ha ka liang ka met, u long ruh u riew kitniam, u nongsneng u nongkraw, uba kyntu, uba kynrong ha ka jingiadei u briew bad U Blei. U la shah jied ban long Tymmen Basan jong ka Balang Presbyterian Mukhap ha ka 22 tarik July 2012 bad la ordain ia u ha ka Presyteri Mowkaiaw kaba la long ha ka Balang Presbyterian Sahsniang ha ka 9 tarik February 2013.
Kum u Tymmen Basan, u long u briew uba pyndep hok iala ka deiti. U long u nongsneng u nongkraw, u nongkyntu u nongkynrong, u nongkyntu u nongkynpham, u nongai mynsiem ban bha ban miat ka longbriew manbriew ym tang ia ki para, ki pyrsa, ia ki khun ki ksiew, ia ki para bangeit jong ka Balang, hynrei ia ki briew baroh. Kum u Tymmen Basan, uba long u briew jong U Blei bad u briew jong ki briew, u kyntu ban tei ia ka imlang ka sahlang da ki kam ym tang da ka ktien.
U la shim ia ka kyrdan longkpa bad iathoh shongkurim ha ka hok kat kum ka hukum ha ka snem 1984 bad ka kong Marphul Sungoh. Ki la ioh hynriew ngut ki khun, laingut ki shynrang bad laingut ki kynthei bad uwei na kita ki khun, u dei u ma Nujorki Sungoh, u MLA ba mynta ka Mowkaiaw Assembly Constituency.
Ka jingkhlad noh u ma Mihsalan Suchiang ha kane ka 7 tarik September 2021, ym tang ka jingduh ia ki khun ki ksiew, ki para ki pyrsa, ki kur ki jait, ka shnong ka thaw, ka long ka jingduh ia ka jaitbynriew hi baroh kawei.