-Ym lah ban ong ba ka jaboh kaba mih ka dei tang na Meghalaya : Sohtun-
Dang shen ka IQAIR ka la ai ia ka Kaiphod ba ka Byrnihat kaba don ha ka Jylla Meghalaya ka dei ka Nongbah kaba jaboh tam ha ka Pyrthei baroh kawei na ka jingdon jong ki karkhana kiba pynmih ia ki jaboh khlem ki lad jingiada ba biang na ka bynta ka mariang.
Namar ka jingioh ia katei ka nam, ka Jylla Meghalaya ka dei kaba mad ia ka jinglehraiñ wat lada ka don ha khap-pud jong ka Assam. Ha ka jingioh iakren bad u Bah Sosthenes Sohtun Myntri ba khmih ia ka Tnad Community & Rural Development Department (C&RD) u la ong ma u bad ka Tnad Meghalaya State Pollution Control Board ka la maham tyngeh ia ki karkhana kiba don ha katei ka jaka kiba pynmih jaboh bad kiba wanrah ka jingjaboh ia ka mariang bad ka lyer.
Shuh shuh u la ong ba ka tnad kam sangeh ban treikam bad la ju rah ia kane ka ishu na ka por sha ka por na ka bynta ban pynduna ia ka jingjaboh. Nalor kata u la iathuh ba la ju wad ia ki lad ban iakhun ia katei ka jingshah bud-nam bad u la ong ba kawei na ki lad ka long ba bun tylli ki Karkhana ki la khang namar ka jingbym lah ban pynbiang katkum ka jingbthah jong ka tnad na ka bynta ban iakhun ia ka jingjaboh.
U Bah Sohtun u la ong ba ym lah len ba ka Jylla jong ngi khamtam ka Byrnihat kadei kaba la iajan bha bad ka Jylla Assam bad bun ruh ki Karkhana na Assam kiba don mar khap kiba la wanrah lang ia ka jingjaboh kaba ar shah. Da ka jingsngewkhia u Myntri u angnud ban ioh ia ka jingiatreilang bad ka Jylla Assam na ka bynta ban bishar lang ia kane ka kam. “Namar kadei ka Jylla kaba don ha Khappud, kata hapdeng ka Meghalaya bad Assam, kumta ngim lah ban ong ba ka jaboh kaba mih ka dei tang na Meghalaya. Tad ynda ma ngi bad ka Assam ngi iatreilang na ka bynta ban sorjamin bad khmih bniah na ka bynta ban ïit ia ka daw bad ban pynduna ia ka jingjaboh, hangta ngin lah ban ioh ka jubab”.
