Ka Hynniewtrep Intergrated Territorial Organization (HITO) mynta ka sngi ka 7 tarik Risaw 2025 ka la wan pyntip sha ki lad pathai khubor haba iadei bad ka jingdon ki jaka die kyiad ha ka shi lynter jong ka surok bah National Highway naduh Ri bhoi shaduh East Jaintia Hills.
Haba kren sha ki lad pathai khubor na ka liang u President u Bah Donbok Dhar u la ong hadien ba ka seng ka la pan ia ka jingdon jong baroh ki wine store ha ki National Highway naduh Ri bhoi shaduh East Jaintia Hills la iathuh ba ha Ri bhoi ki don kumba 78 tylli ki Wine store ha East Jaintia Hills ki don kumba 35 tylli ki wine store bad ha West Jaintia Hills ki don 13 tylli ki wine store ha ki surok bah National Highway bad baroh ki don 126 tylli ki Wine Store ha ki bynta jong ka surok bah National Highway naduh Ri bhoi shaduh East Jaintia Hills.
Nalor kata ka seng ka la pyntip ha u snem 2017 ka Ministry of Road transport & National Highway ka la khang halor ka jingdie kyiad ha ki jaka Surok bah bad ka Supreme Court ruh ka la khang ia ki wine store kiba don ha ki jaka surok bah.
Kaba kham phylla ka long bah haduh mynta ki wine store ki dang don ha kylleng ki surok bah National Highway, ka jingthoh Shop open ha ka jaka Wine store ka long ban shu da rapjot ia kaei kaba la pynmih da ka hukum jong ka Supreme Court bad ka Ministry of Road Transport & National Highway.
Shuh shuh ka Seng ka la ong ba ki wine store kiba don ha kylleng ki surok bah National Highway ki dei kiba beaiñ katkum ka hukum ba la pynmih da ka Supreme Court bad ka Ministry of Road Transport & National Highway namar ki khlem pynbiang ia ki kot ki sla ba la bthah da ka Ministry of Road Transport & National Highway.
Na ka liang ka Seng ka aipor 1 bnai ia ka tnad Excise jong ka sorkar jylla ban pynshai haba iadei bad ka jingdon ki wine store ha kylleng ki surok bah National Highway bad ki Wines store kiba don ha kylleng ki surok bah National Highway ki dei ban pynbiang ia ki kot ki sla katkum ka hukum jong ka Ministry of Road Transport & National Highway bad ka Supreme Court.
