Ka shnong Khliehtyrchi ka long kaba donbok ha kaba ki nongrep jong kane ka shnong kila ïohlad ban ïashim bynta ha ka training kaba 23 sngi kaba sdang mynta ka sngi. Haka jingïalang ban plie paidbah ïa kane ka training ka kong Baïan Blah kaba long ka BDO jong ka Thadlaskeñ Block kala long ka kongsan ha ka jingïadon lang ka kong Mayfereen Ryntathiang kaba long ka President jong ka seng trei mon sngewbha ka Grassroot.
Ha kaba kren lamkhmat ha kaba ïadei bad kane ka jingai jinghikai u ma Chenmiki Laloo na ka seng Grassroot uba la pynïaid ïa ka jingïalang, ula batai bniah shaphang kane ka training. Kane ka training ka kynthup ïa ka jingai jinghikai ïa kiba bun ki jaitkam kiba ki samla bad ki samla rangbah ki lah ban ïoh jingmyntoi. Kane ka training ka kynthup ïa ka jingai jinghikai kum ha kam ri ngap, thung syntiew, kaba shet jingbam tynrai, shet cake, pynkylla ïa ka ñut sha ka sboh bad ka jingbam sniang, shna dawai khniang ïa ki jhur, ka kam shna umsoh, achar, wine, mitmit, ka jinghikai kumno ban seng kam lajong, ki sap nongïalam bad ka rukom kren bad ïadei paidbah.
U ma Laloo ula ong ruh ba ïa kane ka jingai jinghikai ïa kaba la kyrshan pisa da ka Quest Alliance na Bangalore, ka Grassroot kala pynlong da ka jingïatreilang bad ka Society for Urban and Rural Empowerment (SURE).
U Dr H.H. Mohrmen uba long u Secretary jong ka SURE ha ka jingkren jong u, ula sngewkem ban ïoh ban ïatreilang bad ka Grassroot na ka bynta ban pynïoh ïa kane ka training ïa ki nongrep kiba don ha ka shnong Khliehtyrchi. Ula kyntu ïa ki nongrep kiba wan shah hikai ba kin kitkhia, wan tista bad pyndep ïa ka training khnang ba kan long ka jingmyntoi ïa ki. Ula ong ruh ba ka jingthmu ban ai jinghikai naka bynta shibun ki lad ïohkam ka dei ba ki nongrep kin ïohlad hadien ban jied ïa ka kam kaba ki sngewïadei bad sngewtynnad.
U ma Kitbok Rymbai uba long u Waheh Chnong jong ka shnong Khliehtyrchi ula ong ba ki nongshong shnong ki long kiba donbok ba ka training ka wan ha ka shnong hi. Ka jingmyntoi ka long ba haka jaka ba kin hap ban leit sha kiwei pat ki jaka ba kin shim ïa ka training, ka training kala wan ha khyrdop ïng jong ki hi.
Ka kong Mayfereen Ryntathiang, kala kyntu ïa ki kynthei ba kin long kiba shlur ban shim ïa ki bynta ban long ki nongïalam la ka long hapoh la ka ïng ka sem, ki seng ne hapoh la ki shnong ki thaw. I ngeit skhem ba kane ka training kan nangïarap ïa ki ba kin nanglong kiba shlur kham bunshah ban shimti ïa ka kam ban long nongïalam.
Ka kong B. Blah BDO, Thadlaskeñ Block kaba long kongsan ha kane ka jingïalang ka kyntu ïa ki longkmie kiba don ha kane ka training ba kin shim khia ïa kane ka training bad leh ïa kiba bun ki kam bala hikai ïa ki khang ba kin nangkyntiew ha ka ïoh ka kot jong ki. Kala ïathuh khana shaphang kiba bun ki nongrep hapoh ka Block kiba lyngba ka jingïarap kaba ki ïoh na ki SHG kila lah ban kyntiew ïa ka kamai kajih jong ki shimet bad ka ïng ka sem jong ki ruh. Kiwei pat kiba la kren ha kane ka jingïalang ki dei ka Naphisaka Ryngkhlem kaba trei haka Swach Bharat Mission bad u Vivian Oswin Pajuh uba na ka seng Grassroot. Baroh ki nongwan iashim bynta ha kane ka training ki palat ïa ka laiphew ngut.
La ioh ruh ka jingkren na u ma Firstway Syngkon na ka ophis DCIC, Jowai.
