Kum ka jingiasnohkti lang bad shityllup ka pyrthe mynta ka sngi ha West Jaintia Hills District ruh la rakhe ia ka sngi ki nongsynniang snam ia kaba la tip kum ka ‘World Blood Donors Day’ halor ka phang pdeng ‘A Drop of Blood can Save a Life’.
Ia kane ka prokram la sdang shwa da ka jingbam smai kaba la lam khmat da i Additional Deputy Commissioner kong D.D.Syngai ryngkat bad u ma M.A. Challam, Extra Assistant Commissioner, Jowai, i Dr. P. Shylla, Incharge Jowai Civil Hospital Blood Centre ki nongtrei jong ka DC office kaba la pynlong ha Conference Room jong ka ophis u Deputy Commissioner, Jowai.
Ha kane ka sngi la don ka jingai jinghikai bad ka jingsynñiang snam kaba la pynlong da ka Khynroo Khyllood Committee, Kur Sookpoh Khad-Ar Wyrnai, Jowai ha ka jingiatreilang bad ka Jowai Civil Hospital Blood Centre, Jowai ha Jowai Civil Hospital Blood Center, Panaliar.
Na ka liang i Dr. Rita Pohrmen iba dei i Medical District Civil Hospital Ialong ila ai khublei ia ki nongpyniaid bad ruh ia baroh ki nongsynñiang snam ei kiba la kyrshan bad noh synñiang da ka mynsiem ba kylluid jong ki na ka bynta ban ai jingim iano re iano. I Dr. Pohrmen ila ong ba ka dang donkam shibun ngut ban long ki nongsynñiang ba manla ka por khnang ba yn lah ban pynbiang ia ka jingdon jong ka snam ha katei ka jaka kynshew snam.
I Dr. P. Shylla ba dei peit ia kane ka jaka kynshew snam ila batai ba ka snam ka dei ka wei na ki bynta kaba kordor kaba u briew u lah ban ai sha ka imlang ka sahlang. Ka pynkynmaw ba ka snam kaba la ioh na ki nongsynñiang la ioh ban pyndonkam kum ha ka jingsumar (puid) ia ki nongpang, jingsumar ia kiba pang Cancer, haba sumar ia kiba mynsaw bad kiwei de ki jingsumar ia ki jingpang ba bat slem.
I Dr. Shylla ila pynshai ba kino kino ki briew kiba koit ba khiah ki bym don ia kino kino ki jait jingpang kiba don ha ka rta kaba 18-60 snem, kiba don ka jingkhia kaba 45 kg shaneng bad kiba don ia ka hemoglobin level kaba 12.5 kila lah ban ai snam. Ka ong shuh shuh ba ki shynrang ki lah ban ai snam biang hadien 3 bnai bad u lah ban ai haduh 4 sien ha ka shisnem. Katba ki kynthei pat ki lah ban ai hadien 4 bnai ba kila dep ai bad ha ka shisnem ki lah ban ai haduh 3 sien ai. Ka ong ruh ba ka jingai ne synñiang snam ym tang ba ka ai jingim ia kiwei hynrei ka pynbha ruh wat ia ka snam jong u nongai namar kan wan ka snam kaba thymmai ha ka met jong u ne ka.
Kiwei de kiba ai jingkren ha kane ka jingialang ki kynthup ia u ma L. Paswet, Ex Secretary Khynroo Khyllood Committee, Kur Sookpoh Khad-Ar Wyrnai, u ma R. Syngkon, General Secretary, Kynroo Khyllood Committee, Kur Sookpoh Khad-Ar Wyrnai, Jowai u ma B. Shylla, President West Jaintia Adventure Cycling Association, Jowai.