U Hamjngai Law, Executive Engineer ka Khliehriat Distribution Division, MePDCL, Khliehriat, mynta ka sngi 27 tarik u Nailar, u la kren sha ki lad pathai khubor ban pynshai halor ki jingkynnoh kiba la pynmih da ka MPUF bad FKJGP kiba ïadei bad ka memorandum kaba la aiti ha ka 24 tarik u Naitung 2026. Ha kane ka memorandum la dawa ban pynbeit ïa ki bill bording kiba palat, ban pynphai biang ïa ki connection bording kiba la khang bad ban thung shuh shuh ïa ki nongtrei.
U Hamjngai Law u la ong ba ki nongpyndonkam bording kiba don meter kin ïoh bill katkum ka jingpule jong u meter. Ki nongtrei kiba pynmih bill kin pynkhreh ïa ki bill ha kajuh ka sngi katkum ba paw ha u meter.
U la kdew ruh ba bun na ki nongpyndonkam bording ha East Jaiñtia Hills District kim pat don meter. Kumta, ka ophis ka kyntu ïa kine ki nongpyndonkam ban buh meter khnang ba ka bill kan ym long katkum ka jingthew jingmut, kaba lah ban long kaba bakla. Lada ym don meter, ki nongpyndonkam kiba pyndonkam bun ka bording ki lah ban ïoh bill duna, katba kito kiba pyndonkam duna ki lah pat ban ïoh bill palat.
U la pynshai ba ka ophis kam ju ong ba ka jingpyndonkam meter kan pynhiar ïa ka bill. Ka jingthmu jong u meter ka long tang ban thew ïa ka jingbun jong ka bording kaba u nongpyndonkam u pyndonkam, khnang ba yn charge ïa u katkum ka jingpyndonkam kaba shisha. Ka jingdon jong ki meter kiba thikna kan ïarap ruh ban khanglad ïa ka jingduh bording, namar ba ka company ka hap ban thied ïa ka bording kaba ka ai sha ki nongpyndonkam, bad kane ka dei kawei na ki mat jingeh kaba kongsan ha ka rukom pynmih bill mynta.
Haba ïadei bad ka jingbym siew ïa ki bill, u la ong ba ki nongpyndonkam kiba ym siew ïa ki bill ki lah ban shah khang ïa ka connection khlem da ïoh jingpyntip shuh. Shuwa ban khang ïa ka connection, ka ophis ka pynkhreh ïa ka thup kyrteng jong ki account kiba dei ban shah khang. Ka Sorkar ka la pynbna ruh ïa ka One-Time Settlement Scheme na bynta ki bill kiba dang sah kiba heh. Katkum kane ka skhim, ki nongpyndonkam kiba la shah khang connection ki lah ban ïoh pyllait lut 100 percent ïa ki Delay Payment Charges.
Haba ïadei bad ka jingduna nongtrei, u la ong ba ka ophis ka la phah ïa ka jingdawa manpower na bynta ar tylli ki subdivision, khnang ba ki shnong kiba dang duna ne khlem lineman kin ïoh ïa u nongtrei. East Jaiñtia ka ju mad bunsien ïa ki jingpynjulor ne jingdkut ki lain bording namar bun na ki lain ki ïaid lyngba ki jaka khlaw, katba don ruh ki post kiba la sarang bad hap.
U la ong ba ka ophis ka dang ïaleh katba lah da ki nongtrei kiba don mynta, bad don ruh ki skhim kiba lah ban ïoh jingïarap ki nongpyndonkam. Ha kaba kut, u la ong ba ka ophis ka dang pyrshang ban leh katba lah ban pynbha ïa ka jingshakri.