Ka Shad Behdeiñkhlam ba Saw Sngi Lai Miet kaba la sdang naduh mynta ka sngi (sngi Pynsiñ) ha kaba la ïashim bynta lang da ki khun ka Seiñ Raij Jowai kynthup ïa u Dolloi, u Langdoh, u Pator, ki Waheh Wasan bad kiwei de.
La sakhi mynta ka sngi ka shad ñiam Behdeiñkhlam ka la long biang kaba phuh ba phieng ha ryngkat ka jingsawa ki Ksing ki Bhuri ha kylleng ki bynta jong ka shnong Jowai bad kumjuh sha ki bynta jong ka Ïawmusiang. Ki khun ka Seiñ Raij Jowai kila ioh biang ban pyndep ïa kane ka Behdeiñkhlam ha dien 2 snem bala wan lynshop ka khlam Covid-19.
Ïa ka shad Behdeiñkhlam mynta ka sngi la sdang naduh ka por mynstep ha kaba la don ka bam Tyngkong ha ‘Iung Langdoh’ nangta ki khun ka Seiñraij Jowai kila pynkhreh ïa ka Siang ka Pha ban ai bam ai dih ïa ki mynsiem jong ki dkhot jong ka ïing kiba la khlad noh na sla jong pyrthei.
Ha ka por janmiet pat ki khun ka Chilliang Raij (Khon Raij) kila leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha ‘Tre Kjat Loomsooïung’ New Hill Jowai.
Lashai ka sngi ba-ar (sngi Mulong) naduh ka por mynstep u Dolloi, u Langdoh bad ki Waheh Wasan ki sdang ïa ka nguh ka dem ha ka “Syiem Aitnar” hapoh ka jingkhmih jingpeit jong u Dolloi.
Ha ka por jainmiet baroh ki Kmai Raij naduh ka Panaliar, Dulong, Lumpyrdi Ïongpiah, Lumïongkjam, Tpep-Pale, Lumkyrwiang kin pynpoi ïa ki Deingkhlam ha Iawmusiang ha ryngkat jingshad jingkmen, katba ki khun ka Raij kin pynpoi ïa ka Khnong Blai ha Loo Sooïung.
