Ki nongïalam jong ka Meghalaya Commercial Truck Owners and Drivers Association (MCTODA) na Jaiñtia Hills, ryngkat u President u Moslander Marngar bad ki nongñiah trok jong ki transporter ki cement company bapher bapher ha East Jaiñtia Hills hynnin ka sngi ki la ïakynduh ha Amrit cement ban ia kren halor ka jingdawa ka jong ki kum ki nongniah truck.
Ia kane ka jingialang la pynlong ha Amrit Cement bad la wan ban iashim bynta da ki Transporter ka Company Cement, ki driver trok bad ki nongialam ka MCTODA.
Haba kren sha ki lad pathai khubor hadien ba la wai ka jingialang, u President ka MCTODA u Moslander Marngar u la ong ba ia kane ka jingiakhih la khot da ki nongniah trok kiba trei na ka bynta ki transporter cement bapher bapher ha East Jaintia Hills. Ha kine ki taiew ba la dep, ki nongñiah kali ki la pyrshah ïa ka jingkynnoh ba ki la leh bein bad shah ban bein da ki katto katne ki transporter; katto katne ki nongñiah trok ki la pynlong ïa ka jingïakhih palat ar taiew. Ki nongñiah kali ki la pan jingïarap na ki nongïalam jong ka MCTODA, kiba la tuklar bad ïakynduh ïa ki transporter.
Ha ka taiew ba ladep, ki la don ki transporter kiba la khot ïakren ha ki ophis treikam jong ki, katba kiwei pat ki la tyrwa ban ïakren ha ophis jong u Deputy Commissioner. Mynta ka sngi, ki transporter jong ka Amrit Cement ki la khot ia ki nongniah truck bad ia ka MCTODA ban ia kynduh lang. Ki nongñiah kali ki la ïoh lad ban ïakren beit bad ki transporter bad ban pynpaw ïa ki jingeh jong ki. Hadien ka jingiakren kaba la neh shi kynta tam, ki nongniah truck ki la pdiang ia ki kyndon ba la ia mynjur lang ha ka jingialang.
U Marngar u la ong, “Kam long kaba suk ban ialeh ia kine ki mat bad ka kompeni cement bad ki transporter .” U la ong ba ki nongkit ki la pdiang ba baroh ki mat ba la pynpaw yn sa pynbeit naduh lashai ka sngi, ha kaba don kiba yn sa pynbeit hapoh 15 sngi. U la kyntu ia ki nongniah truck ba kin long kiba husiar ban pynthikna ba ki jingkular ba la ai da ki transporter bad ka company cement kin urlong, bad u la maham ba lada ym lah ban pyndep ia ki jingkular, ki nongniah kali ki dei ban wan shakhmat biang ban pyrshah.
Ki nongniah trok ki la ai khublei kyrpang ia ka MCTODA kaba la ai ka jingkyrshan. Kiwei pat ki nongñiah truck ki la ong ba kumba 70% na ki jingdawa jong ki la pyndep ha ka jingïalang mynta ka sngi. Ha kaba iadei bad ka bai bam, ka kompeni ka la pynthikna ₹500 shisngi; la pynkiew ia ka tulop na ka ₹15,000 sha ka ₹20,000 shibnai; ka kompeni ka la kular ruh ban ai shuti saw sien ha ka shibnai, ka insurance, bad kiwei kiwei ki jingmyntoi. Ka Amrit Cement ka la pynthikna ba ïa ki jingdawa jong ki yn pynurlong hapoh 15 sngi.
