Ka Jaintia Student Movement (JSM), Lapangap Unit hapoh ka jingialam u President Heyboime Myrphet ka la phah da ka jingthoh sha u Myntri ka tnad kam Pohïing ka jylla u Bah Prestone Tynsong lyngba u Deputy Commissioner ka West Jaintia ban pyrshah jur halor ka jingthmu ka Sorkar Assam ban tei ia ka Police Outpost ha Lum Pynthor kaba don ha ka shnong Lapangap, West Jaintia Hills District.
Na ka liang ka Seng Jaintia Student Movement ka pyrshah jur ia ka jinglehdonbor ka Sorkar Assam ha kaba iadei bad ka jingthmu ban tei ia katei ka Police Outpost ha Shnong Lapangap khlem kano kano ka jingpyntip bad ka jingbit na ki bor ba dei khmih jong ka Sorkar jylla.
Ka Seng ka pynrem jur bad ka kyntu ia ka Sorkar jylla ban phah sangeh noh shisyndon ia kane ka jingthmu tei Police Outpost ka Sorkar Assam ha Lapangap.
Khatduh ka Seng ka la ong ba lada ka Sorkar kam shimkhia ne leh ei ei halor ka jingthmu buh Police Outpost da ka Sorkar Assam, ka Seng kan sa shim da ki sienjam kiba tyngeh bad kyrmen ba ka Sorkar jylla kan shimkhia haba iadei bad kane ka jingthmu buh Police Outpost ka Sorkar Asaam ha Lapangap, pynpaw ka seng.
